العقل شغلة الكف بتحط ...بقلم: زاكروس عثمان

هلـ الليلة ما كنت على بعضي بالمرة، أفتحت المساء "بخناقة " مرتبة مع المدام، بس الولاد لسه كانوا راجعين من المظاهرة كان دمهم حامي، طلعوا اشرف من نبيل العربي وأشجع من الشيخ حمد، ما قبلوا بالظلم، مشان هيك قالوا:لازم  تعتذر إلى الماما، أنا تنحت وما اعتذرت، الشباب عملوا مظاهرة بالبيت وبلشو يصيحو:الشعب يريد إسقاط بابا، خاصة العفريت الصغير"نط "على ظهري وبلش يشد شعري، وفجأة البيت "تعبى" بأطفال ونسوان الحارة، المظاهرة كبرت، والكل يصيحوا الشعب يريد إسقاط بابا، يا حسرة لأنو ما عندي جيش ولا مخابرات  ولا  شبيحة، عملت متل بن علي وركبت البسكليت وهربت إلى بيت عمي، بالطريق كنت سكران من غير ما اشرب عرق، خبطت زلمة بالبسكليت، هو كمان قام وفتح خناقة العن من الخناقة مع المدام، اجتمعوا علينا الناس"شو في شو مافي"الزلمة قال:هلـ البغل عم يسوق البسكليت وهو سكران، ضربني ووقعني بالأرض وفوق هلـ الشي يخانقني، الناس طلعوا أحسن من هوشيار زيباري، وطلبوا مني أسعف الزلمة، قلت يا شباب صار لي 3 شهور"عم صمد كم ليرة"حتى اشتري مازوت تهريب، الحكومة "شفطت" نص الراتب، من وين بقى أجيب مصاريف الإسعاف، الناس بلشت تصيح:الشعب يريد إعدام أبو البسكليت، حملت حالي وهربت، حتى وصلت بيت عمي، هنيك صار حكي من هون وحكي من هون ودخلنا في السياسة، عمي قال ولله اوباما "غير شي" زلمة محترم و راكز وراح يفوز بالانتخابات القادمة، وأنا بلشت اخبص وقلت:اوباما ابو الاذن الطويلة شقفة عميل لاحمدي نجادي، مشانو راح يخرب أمريكا، ويعمل فيها متل ما عمل غورباتشوف في روسيا، أنا ما بحبو، بس ما عندي مانع إذا بعث لي الوزيرة كلينتون، يمكن أطبقها وأخليها عميلة للشيخ عرعوريان، وهيك راح بيصير توازن بين الشيعة والسنة، ونقضي علـ الفتنة، عمي تنرفز وقال:شو ولاك عم تتمصخر على زعماء العالم، تضرب أنت ومليون عرعوريان شي حلو والله ما ظلو رجال بالدنيا حتى هيلاري تفكر بواحد جحش متلك، قلت:يا عمي يا حيوان، شو دخلك باوباما  وهيلاري حتى تبهدلني مشانهم، قال:"هيك خيو أنا معجب فيهن" لله بالله، قلت:تضرب أنت والإعجاب تبعك، قال:شو بك لتكون صاير شيوعي وما بقى شي في أمريكا يعجبك، بصراحة لما وصفني بالشيوعي ما بقى تحملت، لأنو اكره شي عندي إني أكون شيوعي س طفيلي ، قلت:له وأنت جرثومة امبريالية، ضربنا بعضنا، زوجة  عمي نكاية بالوزيرة كلينتون وقفت معي، وهيك عملنا عليه عصابة المسكين شبع بوكس ورفس وعض، قعد بالزاوية وبلش يبكي وهو بيقول:الشعب يريد حماية دولية، وهيك نزعت السهرة وطلعت من بيته، وأنا منرفز وخجلان وتعبان وجوعان وبردان، الدنيا صارت ليل والجو بارد، وين بدي روح ما بعرف، مشيت بالشارع حتى شفت حالي على باب الخمارة، دخلت وطلبت قنينة نبيذ يعني إذا ما في مازوت ممكن الشعب يشرب نبيذ حتى يتدفآ، عم بيقولو انو الباخرة الروسية اللي وصلت طرطوس مو جاية تنزل سلاح لا لا بس هي جايبة  براميل فودكا  حتى تعوض الشعب السوري الصديق عن المازوت، شربت النبيذ وبلش العالم يبرم براسي، أخذتني غفوة في الخمارة إلى جهنم ، هنيك شفت المرحوم قذافي، خفت كتير فكرت انو جايي يقتلني لأنو أيام الثورة الليبية كنت عم  بهاجمو في مقالاتي، بس باين انو جهنم يؤدب الناس، الرجل اجا لعندي وسلم علي بكل أدب وقال:عرفتني:قلت طبعا أنت عميد الزعماء العرب وملك ملوك إفريقيا، قال طز في العميد والعقيد والمقدم والرقيب والملك، أنا قذافي وبس، أريد أسالك شو حال الدنيا بعد ما طلعوني ميت من أنبوب المجاري، قلت:والله الوضع في الجماهيرية مش ولا بد  لسة في مشاكل، والربيع ما زهر بعد، وعندنا في سوريا الثورة بدها سماد مستورد وما حدا يرضى يزودنا بالسماد، العالم كله متفق على حرمان الشعب السوري من ربيعه، ومشان هيك عم يزودو السلطة بالمبيدات البشرية، القذافي لما سمع كلامي صفن شوي وقال:يعني شيوخ العربان ما تكالبوا على السلطة السورية متل ما تكالبوا علي وما باسو أرجل وأقدام قادة الناتو حتى يعملوا "حظر جوي" على سوريا متل ما عملوا "نو فلاي زون" على ليبيا، وما ضربوا قوات السلطة السورية بالصورايخ الذكية مثل ما ضربوا كتائبي، قلت:لا الكل عملوا عكس ما عملوا معك، الجامعة العربية بسرعة الضوء طلبت من الناتو للتدخل ضدك، وفي سوريا الجامعة تحركت بنفس السرعة ولكن عكس الاتجاه، وعم يفكروا يحصلوا على تفويض من مجلس الأمن حتى يعملوا حظر جوي ضد المتظاهرين ويقصفوا حمص وادلب  بطائرات الناتو، القذافي قال:لا لا مستحيل أنا ما بصدق كلامك، قلت: تعال تفرج على الـ "يوتيوب" هو موثق من لجان حقوق الإنسان و شهادة الأمم المتحدة يثبت صحة كلامي، جن جنون القذافي، طلب ثلاث قناني ويسكي وكرعها ورا بعضها، ودق ايدو علـ الطاولة يزعق، من انتم من انتم يا جرذان يا مكملين، ليه ليه ليه يا عملاء يا خونة استنفرتوا  ضدي في 24 ساعة واشتريتو قرار من مجلس الأمن، وقدمتوه الى الناتو حتى يطيرني ويطير نظامي، يعني النظام السوري أحسن مني، بكرا لما يجي دوركم وتشرفو لعندي والله راح اشويكم شوي، اخ اخ لو رب العالمين يرجع الزمن شوي للوراء، كنت اعرف شغلي معكم يا خنازيـ ... يا ولاد  الشرمو...، سألته يعني شو كان بدك تعمل، قال كنت راح أعطي كل واحد فيهم نسخة من الكتاب الأخضر واطلب منهم يكتبوه 1000 مرة ويحفظوه" بصم" ويا ويلو اللي ما يكتب وظيفتو ويحفظ درسو، والله كنت اسوي لهم فلقة حتى يقولو "جيز" ونكاية فيهم كنت راح اعطي بترول ليبيا لأمريكا، بشرط أن تقوم الوزيرة كلينتون بنفسها و تنتف لحية وشوارب هدول الزعماء الكلا.. واحد واحد على مهل بدون عقيدة ولا مخدر، وتقصف الجامعة العربية بصواريخ توماهوك، قلت بس بعد ما رحلت، أمريكا ندمت على دعم الربيع، وصارت أكثر سفالة من شيوخ العرب، والجامعة اللي ضربت النخوة في راسها حتى تنقذ الشعب الليبي منك، كمان ندمت ورجعت وكر للمجرمين واللصوص، القذافي فكر شوي وقال:يعني أنا رحت "فطيس" والربيع العربي انفجر براسي أنا وحدي، هادا بن علي آكل شارب نايم بالسعودية مبسوط، وهادا مبارك قاعد في سجن خمس نجوم عم يحكم مصر من خلف القضبان، وهادا كذاب اليمن بعد كل جرائمه حصل على حصانة، وهاي الجامعة شغالة 24 ساعة علشان راحة الريس بتاعكم، مش معقول انا بدي انتحر، قلت شوي شوي ابو القذاذيف شو نسيت انك ميت وما بقى يصح لك تهدد ولا حتى تنتحر، ما كان اشرف لك لو تنتحر قبل ما يمسكوك في المجرور ويعملو فيك العمايل السودة، القذافي قال:ما عاد الحكي يفيد، يا ليتني كنت رئيس على بلد فقير بلا بترول بلا بطيخ مبسمر، ترى البترول طلع نقمة علي مو نعمة، هاي أمريكا "مطنشة" على حماية حقوق الإنسان في سوريا، لأنو الشعب السوري ما عندو بترول حتى يوقظ ضمير اوباما ويثير النخوة في رأس المنـ...وك ساركوزي، ويطمع خنازير روسيا وتركيا والصين، قلت أي والله معك حق أنت الوحيد رحت ضحية البترول، حينها سمعت صوتا من خلفي يحتج قائلا:هاي شنو آغاتي ليش نسيتني، مو آني همين رحت ضحية البترول وخيانة أشقائي العرب، نظرت خلفي لأعرف صاحب الصوت، مو معقول شو هلـ المفاجئة التعيسة  المهيب الركن صدام حسين بشحمه ولحمه، يتقدم نحونا حتى يشاركنا الحديث ويحكي عن همومه، وكيف غدر الحكام العرب عملاء الغرب والشرق به، في هذه الأثناء كان مفعول الخمر قد خف في راسي، فقررت مغادرة الجحيم والعودة إلى الدنيا، فقد تحملت الحديث مع القذافي لان حديثه شيق، ولكن لا أظن إني أطيق الجلوس مع مجرم كصدام حسين أو الاستماع إلى حديثه، لهذا خرجت من الخمارة متجها إلى البيت، وأنا أفكر بوضع خطة إصلاحات منزلية اخدع بها المدام والأطفال، حتى أحافظ على عرش رب الاسرة، رجعت إلى البيت ومن على الباب الخارجي بدأت ارش زوجتي وأطفالي بحزمة إصلاحات مغرية، الحمارة صدقت الحكي وفتحت الباب، وبعد شوية معاتبة ومحاسبة "حوار وطني" تفاهمنا، بعدين قالت:الله يسامحك يا منظوم بعمري ما شفتك منرفز متل ما كنت منرفز اليوم، شو قصتك يا زلمة، قلت: معك حق يا بقرتي الحلوة، بس شي اللي عم بيصير يطير العقل، المعارضة القديمة تعمل لي جلطة في العمود الفقري، والجامعة العربية ترفع ضغط الفيل الهايج في روحي، واليوم بالذات لما شفت دابه تلبس سترة برتقالية، ولما سمعت تقرير السواح العرب فيوزاتي كلها انضربو دفعة وحدة، وقامت موجة تسونامي في دمي فجرت المفاعل النووي في عروقي، ما قدرت اتحكم بأعصابي مشان هيك بلعت دزينة من حبوب القذافي، ولما رجعت علـ البيت فشيت خلقي عليك، قالت:وأنا شو خصني، مرة تشاكسني مشان اردوغان ومرة مشان بوتين ومرة مشان اوباما ومرة مشان حسون وبوطي، ومرات مشان حمد، ومرة مشان بان قي مون ومرة مشان نبيل العربي، شو هاد يا  شو مفكرني محكمة العدل الدولية وأنا مو دريانة، شوووو يا ابن عمي مو أحسن تفكر بكاس مازوت وجرة غاز، عاد النقاش حاميا بيننا، ونهض أطفالي السلفيين المندسين من الفراش ينادون:الشعب يريد إسقاط البابا، وعاد صغيرهم يصيح يا بابا يا مفتاح تضرب أنت وهلـ الإشلاح، طبعا هلـ شي بيدل على انو أطفالي عملاء لأمريكا ومشان هيك يرفضون الإصلاحات اللي عم بطبقها على الهواء مباشرة، طبعا انا إلغيت الإحكام العرفية و قوانين الطوارئ وإعلنت قانون مكافحة الشعب عفوا مكافحة الإرهاب، اللــــــــــــــــــه يستر، ما حدا بيعرف بعد الدابه شو راح يطلعلنا، بس ما يكون كركدن.  

زاكروس عثمان