Weku Mendalekiye…Helbest: Mehmûd Badilî

Li pey siya xelkê baz dide

zimanê xweyî şewitî

ji her kesî re dirêj dike:

" Ji bo xatirê Xwedê..

Xwedê zarokên we ji we re bihêle..

û wan  neke wek min..".

Payîza dengê xwe

li ser peyareyan radixe

Carinan

di berîkên vala de

tiliyên xwe gez dike…

Carnan

di kurkê dilovaniyê de

êşa xwe ji bîr dike.

Bajar..

di hinavê kovanên wî de

vedimire.

Xemgînî labelabke..

bi dîwarên kûrahiya wî ve

radipelike.

Her kes dibûre

kes li pê xwe nazîvire

û ew

hedana xwe

bi pêsîrên sawîran

şîr dide.

Hemî navên Xwedê yên xweş

li ser paçikê parsê radixe

Pişta wî li dîwarekî reşe

berê wî li ronahiyek nediyare

û berf di hindirê wî de

dibare.

Bajar li ber çavan

li ser serê xwe dimeşe..

û pûtên meydanên wî,

şevbuhêrkên xwe

bi tozê..

bi hêçka wî û hevalên wî yên boyaxçî,

li qiraxên bêhêviyê

dixemilîne.

Ne ji bilindahiyê fêm dike

ne ji nizmahiyê,

lê dizane

çawa jiyan

mişextiya wî li kolanan par dike.

û çawa dêya wî

li ber deriyê jiyana wêyî ku

ber bi valahiyê de diçe

dest li ber ruwê sar

diponije…

bêdengiyê bi tisî dipûrisîne.

Û ji bo çi bavê wî..

nifiran li roja zayîna xwe

dibarîne..?

Naxwaze her tiştî nas bike

taku li hember tiştên nepenî

nekeve.

Dizane hez bike

dizane biqehere

lê gelek caran.. ken û girî

di hindirê xwe de dikuje

belê ji maçên kevokan

xewşbûna jiyanê nas dike.

Toze..

disûrike her quncikî,

tîrêje..

ligorî xewnên destê xwe

dipijile her aliyan.

gelek caran

pêxwas li kolanan baz dide

her tiştî ji keçikanî dixe

bi tîqetîqa kenê xwe

cîhanê tevî bazar dike.

Ba li nava xwe dipêçe

ji sotina dilê xwe

çixareyan vêdixe

dema dikişîne

gerdûnê tevî himêz dike.

Dilovaniyê pars dike

bêpariya xwe

li kolanên bê xwedî mahr dike

û lay wek berikên damê

xewnên wî belav dikin.

Porê wî

ji destê bav yê zivir hez dike

û ji awirên wîyî tûj

çavên wî jî

ji baranê.

Xwe li cîhaneke berfireh dibîne,

û temenê wî

cotek sole

di lingê bêpariyê de

 dirize.

Mendaleke..

kurte çîrokek

 nediyare

di wêneya vê cîhana afirandî de

winda dibe.