Xebat-karekî kurd hate xewna min…Nivîs: Zinar Mistefa

Ew  xebat –kar, "Hesen Salih" bû. Yan jî ez bibêjim : Min"Hesenê Tenûrî"  di xwe de dît. Ew xewneke bi lez û bez bû - ji nîşkê ve çêbû û di cih de jî xilas bû- .  Min derî  vekir ku ez  ji odê derkevim; dîtina min dîtî ku "Hesen" li pêşiya min e.  Li hawîr dorî wî  elaletek  xelk hebû. Silav me da hev û  me pirsa hev û du kir. Û wilo me xatir ji hev xwest. Ez  meşîm , Hesen jî derbas bû hindirû. Eha ew bû hemû xewna min.  Bêguman hûn hemû dizanin ku "Hesenê Tenûrî"  û çend hevalên xwe û gelek tekoşerên kurd îro di hepis û zindanên  rêjîma  "Be'is" ya nijad-perest de, bi sema xeke xurt, berxwedanê di  ber mafên gelê kurd de dikin.

Mamoste Hesen berê jî hatibû girtin û weke mamosteyê dibistanê , ew û çend mamosteyên  kurd di sala 1966 an de,  ji parêzgiha Hisiça hatibûn dûrxistin, û  ew tevde sergûnî "parêzgiha "Siwêda" – çiyayê  Dirûzan"kiribûn. Weke ku Hesen ji min re gotibû: Wê çaxê, ango di sala 1966 an de , mamosteyê mezin û damezrenêrê partiya demoqrata kurdî li Sûriyê. Dr. N.Zaza li "Siwêdayê"sergûnkirî  bû . Li otêlê,  Zaro (mamoste), Dr. Nûredîn dibînin. Ew ji wan re dipeyive û behsa pirsa kurdî dike. Û her wesa, ew gelekî  li ser giringîya zanîna zimanê kurdî  diraweste û ji wan mamosteyan dixwaze ku xweşik fêrbibne  zimanê xwe- bi nivîsandin û xwendin.

Hebûn û zanîn û fêrbûna zimanê kurdî pir giringe û serê defterêye  ji bo parastina netewa kurd. Di wî warî de, Dr.N. Zaza gotibû:

Gelî  kurdan  !

Eger hûn naxwazin ji hev taromar û winda bibin, berî  her tiştî; zimanê xwe bixwînin û bidin xwendinê.

Lê eger dizwazin  xwe nasbikin û bidin naskirin û hizkirin, bi hevaltî û dostaniya miletên dî re pêş  ve herin , û birûmet û serbilindî bijîn , dîse zimanê xwe bixwînin û bidin xwendinê.

Belê , banga rehmetiyê Dr. Nûredîn pir hêjaye ji bo parastina zimanê kurdî. Ji kinarê xwe ve, em  banga xwe hildidin ji boyî azadiya mamoste Hesen û hevalên wî  û hemû girtiyên siyasî û kesên bê guneh,  çi  kurd û çi  ji miletên dîtir ku li hepis  û zindanên Sûriyê girtîne.