Share |

به‌ده‌ل ره‌ڤو شه‌ڤێن ڤییه‌نا ب هه‌لبه‌ستێن كوردی رۆهنكرن…به‌یارێ زاویته‌یی

شاهبازێ هه‌لبه‌ستا كوردی د ئێڤاریه‌كا تایبه‌ت دا (2472015) ل دۆر ئه‌ده‌بێ كوردی ل ئه‌سمانێ ڤییه‌نا فڕی كو هه‌لبه‌ستڤانێ ناڤبری نموونا دلپاكی و

وه‌فاداریێ یه‌ بۆ دۆزا گه‌لێ خوه‌یێ كورد كو هه‌می كاراێن خوه‌ بێی راسپاردن یان ئه‌ركه‌كێ فه‌رمی ئه‌نجام دده‌ت و ل دووڤ گۆتنا هنده‌ك نڤیسه‌ر و ره‌وشه‌نبیرێن كورد و بیانی به‌ده‌ل ره‌ڤه‌ یێ ژ هه‌ژی یه‌ ببیته‌ بالیۆزێ ره‌وشه‌نبیریا كوردی ل هانده‌ران.

گه‌شتیارێ ئه‌ده‌بی ل پایته‌ختێ نه‌مسا بۆ مێهڤان و هه‌ڤال و هه‌لبه‌ستڤان ل په‌یمانگه‌ها ئورۆئاسیه‌وی یا مالا عه‌ره‌بی و نه‌مساوی یا ره‌وشه‌نبیری و هونه‌ری ب هه‌لكه‌فتا ئیمزاكرنا پرتووكا به‌ده‌ل ره‌ڤوی یا ب ناڤێ "باز و هه‌لبه‌ستێن وه‌لاێ به‌فرێ و ئاگری" یا ژ مالا كاروبارێن ره‌وشه‌نبیری ل به‌غدا ده‌ركه‌فتی هاتیه‌ رێكخستن، كو به‌ری نوكه‌ و بۆ گه‌له‌ك جاران ئه‌ڤ چۆره‌ چالاكیه‌ بۆ بالیۆزێ ئه‌ده‌بێ كوردی ل مالا كوردان ل نه‌مسا ب هه‌لكه‌فتێن ئه‌ده‌بی و شعری ل باژێرێن سالزبورگ و ڤییه‌نا هاتینه‌ رێكخستن.

رۆماننڤیسا عیراقی د. ئه‌میرا فه‌یسه‌ل، هه‌لبه‌ستڤان به‌ده‌ل ره‌ڤو بۆ به‌رهه‌ڤبوویان دا نیاسین و به‌حسی ژیان و خواندن و به‌رهه‌مێن ویێن ئه‌ده‌بی و شعری كر و پویڤه‌كا راستگۆ د ده‌ر حه‌قێ ڤی كه‌سی دا گۆت: مالا عه‌ره‌بی شانازیێ ب خوه‌ دبه‌ت كو هه‌لبه‌ستڤانه‌كێ كورد و ئه‌دیبه‌كێ گه‌شتیار مێهڤان بكه‌ت، به‌ری هه‌لبه‌ستڤان به‌ده‌ل ره‌ڤو بهێت و ده‌ست ب خواندنا هه‌لبه‌ستان بكه‌ت، هونه‌رمه‌ندێ كورد عه‌بدولره‌حمان ب سازا خوه‌ هنده‌ك ئاوازێن چیا ژه‌نین. هه‌لبه‌ستڤانێ ناڤبری بخێرهاتنا جه‌ماوه‌ری كر كو ژ وه‌لاتێن مسر و سوودان و لیبیا و عیراق و كوردستانێ و ئوردون و سووریا هاتبوون، ل ده‌ستپێكێ ناڤبری به‌حسێ ئه‌ده‌بێ هانده‌ران كر و دیار كر كو هه‌لیه‌ستێن خوه‌ ل وان وه‌لاتان نڤیسینه‌ یێن وی سه‌ره‌دانا وان كری و هه‌ر هه‌لبه‌سته‌كا وی چیرۆكا گه‌شته‌كێ و ده‌مه‌كی و جهه‌كی و خه‌مه‌كێ یا ل دووڤ هه‌ی و هه‌لبه‌ست هه‌ڤركیه‌كه‌ د ناڤبه‌را وی و ناخێ وی دا.

هه‌لبه‌ستێن هه‌لبه‌ستڤانی ده‌نگێ راستیێ و مرۆڤاتیێ بوون و گۆت پێدڤیه‌ ئه‌دیب ببیته‌ ده‌نگێ گه‌لێ خوه‌ و ب خه‌م ڤه‌ گۆت كو هه‌لبه‌ستڤانێن وه‌لاتی و هه‌لبه‌ستێن وان ساخله‌تێن ئه‌ده‌بێ هانده‌ران پێڤه‌ دیار دبن و دێ بینین ئه‌و د وه‌لاتێن خوه‌دا د هاڤی نه‌ و ل ڤێرێ مه‌ره‌ما وی ئه‌ده‌بێ راسته‌قینه‌ بوو و نه‌ به‌حسێ دهۆل قوت و زڕنا بێژان بوو.

ئه‌و هه‌لبه‌ستێن ره‌ڤوی خواندین ل وه‌لاتێن مه‌غربو هندستانێ و مه‌كسیك و كازاخستانێ و نه‌مسا و مسر و هنده‌ك وه‌لاتێن دی هاتبوونه‌ ڤه‌هاندن، جه‌ماوه‌ر ژی ب شێوه‌كێ نه‌ پێشبینیكری ل گه‌ل هه‌له‌ستێن وی دژیا و باندۆره‌كا مه‌زن لێ هاته‌ كرن.

پشتی ڤێ چه‌ندێ گه‌نگه‌شه‌ك هاته‌ كرن و مێهڤانی به‌رسڤا پرسیارێن جه‌ماوه‌ری دان و پاشی ئیمزا ل سه‌ر پرتووكا "باز" هاته‌ كرن كو 66 هه‌لبه‌ستڤانێن كوردستانێ ژ كچ و كوڕان بخوه‌ڤه‌ دگریت. هه‌لبه‌ستێن ره‌ڤوی ب زمانێن كوردی و عه‌ره‌بی هاتنه‌ خواندن و په‌یڤێن جوان و نازك و تێر رامان تیچدا بوون كو مرۆڤی پێ هه‌ست ب خه‌ریبیا وه‌لاتی دكه‌ت.

سوپاس بۆ ته‌ هه‌لبه‌ستڤان به‌ده‌ل ره‌ڤو و ئه‌م چاڤه‌رێ ینه‌ كا دێ گه‌شتا ته‌ یا بهێت دێ ل كیش جهێ دونیایێ بیت، به‌ده‌ل ره‌ڤو نڤیسه‌ر و میدیاكار و ئه‌دیب و وه‌رگێرێ ئه‌ده‌بێ گه‌شتانه‌ كو تلمۆرێن وی ددیارن و ل جیهانێ دگه‌ریت دا ره‌وشه‌نبیریا كوردی به‌لاڤ بكه‌ت و ل سه‌ر كیستێ به‌ریكا خوه‌، له‌ورا ره‌ڤی جهه‌كێ تایبه‌ت ل نك وه‌لاتیێن خوه‌یێن كوردستانێ هه‌یه‌ و بتایبه‌ت كه‌سێن ساده‌ و ساكار و هه‌ڤبه‌ندیێن ب هێز ل وه‌لاتێن عه‌ره‌بی یێن هه‌ین له‌ورا شیا ره‌وشه‌نبیریا كوردی ل گه‌ل كانیێن ئه‌ده‌بێ مرۆڤاتیێ تێكهه‌ل بكه‌ت. نموونێن وه‌كو ره‌ڤوی ژ هونه‌رمه‌ند و ئه‌دیب ناسناما راسته‌قینه‌یا وه‌لاتێ خوه‌نه‌، دگه‌ریێت و گه‌شتان دكه‌ت و كوترا هه‌لبه‌ستا كوردی ل گه‌ل وی د ئاسوویێن ئه‌ده‌بێ مرۆڤاتیێ دا دفڕیت. چاڤێ مه‌ یێ ل به‌رهه‌م و چالاكیێن ته‌ هه‌لبه‌ستڤانێ هێژا و كوردپه‌روه‌ر.