Share |

خۆزی ئاگرێ باباگۆرگۆر دارەكا زەیتوونێ با…مؤيد طيب

 

ئەز ئاگرێ باباگۆرگۆر دبینم
ئەز ل پرتەكا رەژویێ دگەرم
رویێن خۆ پێ رەش بكەم
ھەر جارەكا
ئەز زەیتوونەكا عەفرینێ دبینم
ئەز ل پرتەكا رۆژێ دگەرم
دلێ خۆ پێ گەش بكەم
ھەر جار ژی
بارەكێ رەژویێ ب دەست من دكەڤیت
لێ پرتەكا رۆژێ
ژ ئەسمانا ناكەڤیت
خانی!
پیرێ من!
كوچكێ خۆ یێ ڤەمری نیشا من بدە!
ئەز ھەمی خۆلیا بنێ وی
ب سەرێ خۆ وەربكەم
پاشی بێژم:
نامووسە ل حاكم و ئەمیران
تاوان چ یە شاعر و فەقیران

28/1/2018
دھۆك

****

 

برینەک

تەھران
کڕنی یە
ئەنقەرە
زرکێتکەکا دڕ
شام و بەغدا
دو مێشێن شڕ
ئەڤە سەد سالن
داداینە سەر برینەکا جەرگبڕ
ڤێ برینێ
نە دەست ھەنە ژ خۆ کش بکەت
نە پێ ھەنە ژ وان برەڤت
نە زھا دبت
نە تەنا دبت
ئەڤ برینە
جانێ منە
ئەڤ برینە
دلێ منە
ئەڤ برینە
خۆپانا وەلاتێ منە

 

----