Share |

خەمگین رەمۆ: دڤێ ھەلبەستڤان بەردەڤکێ ملەتێ خوە بە… ھەڤپەیڤین: دەمھات دێرکی

خەمگین رەمۆ
خەمگین رەمۆ

 

 نڤیسکارێ کوردیێ رۆژاڤایێ کوردستانێ خەمگینێ رەمۆ، ل سالا ١٩٦١ێ ل گوندێ تەھلکا مالباتا جەمیل پاشا،یا ب سەر دربێسیێ ڤە ژ دایک بوویە. نڤیسکار خەمگینێ رەمۆ خوەندنا خوەیا سەرەتایی ل گوند کوتا کریە،یا ئامەدەیی ل باژارێ دربێسیێ،

ل قۆناخا خوەندنا ناڤەندی ژ بەر ھن سەدەمێن تایبەت دەست ژ دبستانێ بەرددە، لێ دەست ژ فێربوونا کەساتی بەرنەدایە، تا رۆژا ئیرۆ د وارێ وێژەیی  دە مژوولە ، ژ دەستپێکا سالێن ٩٠ی دە بەرھەمێن خوە ل رۆژاڤا ، باشوور ، باکور ، د گەلەک گۆڤار و رۆژنامەیان دە دوەشینە ، ھەر وھا د گەلەک مالپەرێن جوور بە جوور دە ، تا نھا ٨ پەرتووکێن خوە ژ ھەلبەست و چیرۆکا چاپ کریە و ٤ پەرتووک ژی ئامادەنە ژ چاپێ رە ، ب نڤیساندنێ مژوولە و نڤیساندن مژارا وییا سەرەکەیە د ژیانێ دە.

 

 

 

  •  برێز خەمگین رەمۆ، ھەر ھەلبەستڤانەک چیرۆکا خوەیا نڤیساندنا ھەلبەستێ ھەیە، گەلۆ چیرۆکا وە چاوا دەستپێکر، چما ھەلبەست و نە شاخەک دنیێ وێژەیێ؟

 

  •  بێ گومان، بەری نڤیساندنا ھەلبەستێ پێشەکی ھەنە ، کو ئەز ژ ئەزموونا خوە دەستپێ بکم ، ل سەردەما خوەندنا سەرەتایی ، من ژ وێنەکێشیێ ھەز دکر و دەفتەرێ من ھەر تژەبوون ، من ل سەر تشتنی دن ژی وێنەکێشی دکر و ھەر وھا من ژ سترانێ ژی ھەز دکر و ژ خوە رە دسترا ، د گەل گوھداریکرنا چیرۆکێن دەڤکی کو باڤپیرێ من چیرۆکبێژ بوو و د شەڤێن زڤستانی دە ، مە لێ گوھداری دکر ، ئەڤ پێشەکیێن بەری نڤیساندنا ھەلبەستێ بوون ، تا کو ل تەمەنێ نۆزدەھ سالیێ ، من ھەلبەستا خوەیا یەکەم ل دەستپێکا سالا ١٩٨٠ێ ، ژ چاڤێن کەچەکە گوندی رە نڤیساند ، پشتی ھنگێ ، ھلم ب ھلم من دەست ژ وێنەکێشیێ بەردا و ژ دل و جان بەرێ خوە دا نڤیساندنێ ، شاخا دووەم ژ پرسا تە : کو چما ھەلبەست و نە شاخەکی دن ژ وێژەیێ ؟ دبە کو ئەز وەک ھەلبەستڤانەکی ھاتبم ناسکرن ، لێ ژ سالا ١٩٨٥ا دە ، ئەز کورتە چیرۆکان ژی دنڤیسم و سێ پەرتووکێن منیێن چیرۆکی ھاتنە چاپکرن ، ژ بلی وەرگەراندنێ ، من رۆمانەک ژی وەرگەراندیە د گەل ١٦ خەلەکێن تەلفزیۆنی ھاتنە وەشاندن ، ھەر وھا من ھن ھەلبەستێن لۆرکا ژی وەرگەراندنە.

 

  •  بێھنا وەلات، بێھنا ئەڤینێ و ئێشێ ژ ھەلبەستێن تە تێ. چ تێکلیا ھەلبەستا خەمگین رەمۆ ب کەسایەتیا ھەلبەستڤان ڤە ھەیە، ئەم دکارن بێژن ھەلبەست ھەلبەستڤان تینە سەر زمان؟

 

  •  پرسەک خوەشە ، ئەزا ھەلبەستڤان ،یا نڤیسکار ، ئەزەکە گشتیە ، نەمازە گاڤا کو ھەلبەستڤان لاوێ ملەتەکی بندەست بە ، دڤێ کو ھەلبەستڤان ، نڤیسکار ، پێگێرێ دۆزا خوە بە ، بەردەڤکێ ملەتێ خوە بە ، راگھێنەرێ ئێش و ژانێ وی بە ، و ھن نڤیسکار ژی ھەنە پێگێریێ ب چ تشتی ناکن ، ژ بلی مژارێن خوەیێن تایبەت ، دووری بیر و باوەریانە ، راستە تشتنی تایبەت ھەنە ، لێ ل گۆری شێوەیێ نڤیسکار دمینە کو وان تایبەتیا کاربە بکە مژارەکە گشتی ، گاڤا کو ئەز ھەلبەستەک ئەڤینی دنڤیسم ، نە ئەڤینا من ب تەنێیە ، گەرەکی ھەر یەکی خوەندەڤان خوە ئەڤیندار ببینە ، نڤیساندنا ھەلبەستێ ل با من نە یەک تایە ، ئەز ب ئاواکی سیمبۆلی دنڤیسم ، وەلات ل با من دلبەرەک نازدارە ، دایکەک بەلەنگازە ، ئەز ئێش و ژانێن خوە ، ھێڤی و داخوازێن خوە ، ب رێیا ڤێ ئەڤینێ تینم سەر زمێن ، لێ مخابن خوەندەڤانێن مە ھندەکی تەرلانن ، ئەز ڤێ یەکێ ل سەر رووپەلا خوەیا فیسبۆکێ تێبینی دکم ، کو دبێژن : ( دلێ تە خوەش بە ! تو دووری دەرد و کولا بە ! نابێژن : ب ھێڤیا کو دلێ مە خوەش ببە ، ئەم دووری دەرد و کولابن ، دلبەرا مە ھێژایە ). 

 

  •  ژ کەرەما خوە تو دکاری ھنەکی بەھسا بەرھەمێن خوە بکی، وەک چاپکرنا پرتووکان و گەلۆ زەھمەتی ل پێشیا وە دەردکەڤن، گەر ھەبن ئەو چ نە؟

 

  •  بەلێ ، من تا نھا ٤ پەرتووکێن ھەلبەستا و ٣ پەرتووکێن چیرۆکا چاپ کرنە ، ھەر وھا ٣ێ پەرتووکێن ھەلبەستا و ١ چیرۆک ، ئامادەنە ژ چاپێ رە ، ژ لایێ زەھمەتیا ڤە ، بەلێ زەھمەتی ھەنە ، وەشانخانەیێن مە ،یێن سەربخوە نینن ، ل ھەر پارچاکی دەستھلاتداریەک ھەیە ، کو ئەو ژییا پارتیێن مە نە ، کو ھن نڤیسکاران ددن پێش و ھنا ژی د سەر گوھان رە داڤێژن ، یانی دلخوەستنە ، خال و خوارزێتیە ، ھەڤالتی و ئالیگریە ، د گەل کو بەرھەمێن من ل سازیێن جوور بە جوور ھاتنە چاپکرن ، مینا ھەڤگرێدانا کاوا ، سازیا سەما ، یەکیتیا نڤیسکارێن کورد ل دوھۆکێ ، و چاند و ھونەر ل رۆژاڤا ، لێ نە ل ئاستا خوەستنێ نە ، بەری دەمەکێ ئەز ب رێڤەبرێ وەشانخانەیەکێ ل ئامەدێ  کەتم تێکەلیێ دە ، پەرتووکەک منی چیرۆکان ھەیە ، من دڤیا کو ل باکور چاپ بکم ، جامێر ژ من رە گۆت : رەوشا مەیا ئابووری نە گەلەکی باشە ، ئەگەر کو تو ئالیکاریا مە بکە ئەمێ چاپ بکن !ھەر وھا ھەر پارچاک تەنێ نڤیسکارێ پەرچەیێ خوە ناس دکن ، نایێ بیرا وان کو بەھرەمەند ل پەرچەیێ دن ھەبن ، ئەڤ ژی کێماسیەک مەزنە.

 

  •  ل رۆژاڤایێ کوردستانێ چ جوداھیا د ناڤبەرا ھەلبەستا سالێن ١٩٨٠ ئان ویا ئیرۆ دە ھەیە، تو د رۆژا ئیرۆ دە ئاستا ھەلبەستا ل رۆژاڤایێ کوردستانێ چاوا دبینی ؟

 

  •  جووداھیەکە مەزن چێبوویە ، ئەم نڤشێ سالێن ھەیشتێیان کو مە ب ھەلبەستا کلاسیک دەست ب نڤیساندنێ کر ، ژ بلی بەرھەمێن جەگەرخوین تشتەک ل بەر دەستێ مە نەبوو ، من ب خوە دەھ سالێن پێشی وەک ئەزموونە ، ھەلبەستا کلاسیک دنڤیساند ، و دیوانا خوەیا یەکەم( ئاخینا دİل) ل سالا ١٩٩١ێ ، ب ڤی شێوەیی ل شامێ چاپک کر ، بەری ھنگێ ، یان پشتی کاریسەتا ھەلەبچا ، من دیت کو ھەلبەستا مەیا بەند کری ، ئێدێ نەما دکارە مە بغینە ئاسۆیێن بلند ، ڤێگا من دەست ب ھەلبەستا سەربەست ،یا نووژەن کر و تا نھا ئەز ب ڤی شێوەیی بەردەوام دکم ، پشتی سەرھلدانا باشوور ، تێکەلیێن مە فرەھ تربوون و بەرھەمنی نوو دغان بەر دەستێ مە ، ل رۆژاڤا ژی چەند گۆڤارا دەست ب وەشانێ کر ، مینا ، زانین  کو من وەک ئەندامەکی بەردەوام بەرھەمێ خوە لێ دوەشاند ، ھەر وھا گۆڤارا ئاسۆ ، پİرس ، جووداھیا نڤشێ سالێن ھەیشتێ یان ژ نڤشێ بەری مە ئەڤ بوو ، کو نە تەنێ ھەلبەست ، بەلێ کورتەچیرۆک ، شانۆ ، رۆمان ، وەرگەر ، گۆتارێن جوور بە جوور دھاتن نڤیساندن و د ناڤ رووپەلێن وان گۆڤاران دە دھاتن وەشاندن ، سەبارەتی پرسا ھەلبەستێ ل رۆژاڤا د چ ئاستێ دەیە ؟ نڤیساندن ب تەڤایی ب رەوشا گشتی ڤە گرێداییە ، ئارامی ژ بۆ نڤیسکار پێویستە ، ھەر وھا رەوشا ئابووری  بنگەھەک سەرەکەیە بۆ ئافراندنێ ، لێ دیسا ژی و د گەل ڤی ئاوایی ژی ، ئەز دکارم بێژم، کو رەوشا ھەلبەستێ ل گۆری رەوشێ ل پێشە ، نە وەک ئالیێن دن کو ب شووندە ڤەدگەرە.   

 

  • گەلۆ ھەلبەست دکارە باندۆرا خوە ل جڤاکێ بکە و جڤاکێ بەر ب گوھارتنێ ڤە ببە؟

 

  •  نە خێر ، ئەڤرۆ نە دەما خوەندنێیە ، ئەم ل سەردەما نەتێ نە ، خوەندەڤانێ پەرتووکان مخابن گەلەکی کێم بوونە ، و دڤێ کو ئەم ڤێ ژی بزانبن : ھەلبەست بەری ھەر تشتی ، تشتەکی گیانیە ، ھەلبەست نە چەک و بمبەیە کو کۆزک و چەپەرێن دژن بھلوەشینە ، لێ رۆلا ھەلبەستێ ، دکارە ھێڤیان د دلان دە بچینە ، ئێش و ئازاران دیار بکە ، و وارێ دلبەرێ ب دلداران شێرین بکە ، ھم ژی دکارە پرس و ترسێ ب خوەندەڤانا رە چێ بکە.

 

  •  برێز خەمگین رەمۆ، مفاکە مادی ژ بەرھەمێن خوە دبینی، یان ب دراڤێن خوە بەرھەمان چاپ دکی؟

 

  •  من تا نھا چ مفایێ مادی ژ پەرتووکا وەرنەگرتیە ، نە ژی سترانبێژێن کو ھەلبەستێن من ب دەھان ھاتنە ستراندن چ ماف وەرگرتیە ، و نە ژی چ کەس ل مە دپرسن ، وەک تە پرس کری ، گەرەکی تو نھا مافێ منیێ ڤێ ھەڤپەیڤینێ ژ من رە بشینە ، ( ئەز دکەنم ) من پەرتووکا خوەیا یەکەم ب تەنێ ژ پێریکا خوە چاپ کریە ،یێن مایی سازیان ژ من رە چاپ کرنە.

 

 

  •  گۆتنا داوی

 

  •  ئەگەر کو ھندەک گوھدان ب نڤیسکارا ببە وێ باش بە ، بەرھەمێن مە دڤێ کو بێنە چاپ کرن ، زمانێ مە گھایە ئاستا مان و نەمانێ ، نەمازە ل باکور ، ل ڤێرێ دڤێ کو دام و دەزگەیێن راگەھاندنێ ب رۆلا خوە رابن ، و ھەزکرنا زمێن د ھەر مالێ دە بچینن ، ئەڤ زارۆکێن ئیرۆیین پاشەرۆژا مەنە ، لێ کو وان ژی زمانێ خوە وەندا کر تشتەکی مە ل مەیدانێ نامینە ، داوی سەرکەفتن بۆ وە ، د گەل رێز و سلاڤێن گەرم بۆ ھەمی کارمەندێن گۆڤارا ئەڤرۆ و ھەر دەم ل پێش بن. 

 

دەمھات دێرکی

رۆژنامە ئەڤرۆ

ھەژمار

٣٣١٧

١١.٤.٢٠٢٣