Share |

ســـــاقــی نــــــامــــــــە … نوسین: نەبەز پێنجوێنیی

ساقیا! هاتم بەرەو مەیخانەکەت

هاتمە خزمەت بادەوو پەیمانەکەت

من کە بێزارم لەدەست ژینم دەبا

قەستی سەر بێ بادە بێ ئامانەکەت

بێ مەییم هەرگیز نەکەی تا ماوی تۆ

ڕۆح و ماڵ و دڵ بە فیدای چاوی تۆ

ساقیا! دڵ پڕ خەمم ، دڵ پڕ خەمم

بێ دیار و بێ ڕەفیق و هاودەمم

گۆشەیی مەیخانە بۆچیی چۆڵ بکەم

من کە واریسی وەلی و لاس و مەمم

بێ مەییم هەرگیز نەکەی تا ماوی تۆ

ڕۆح و ماڵ و دڵ بە فیدای چاوی تۆ

ساقیا! هاتم لە دوور ، هاتم لە دوور

لەو مەیەی دەستت نەکەی هەرگیز قسوور

نامەوێ ساتێ بە هوشیاریی بژیم

تێکە بۆم ئا لەو شەرابەی ئاڵ و سوور

بێ مەییم هەرگیز نەکەی تا ماوی تۆ

ڕۆح و ماڵ و دڵ بە فیدای چاوی تۆ

ساقیا! کوانێ بەشم ، کوانێ بەشم

تۆ دەبینی حاڵی دڵ چۆن وا بەشم..

شێری خەم زامار و ئەنجنراوە، دەی..

خێرە گەر بێیت و بە مەی خۆشکەی کەشم

بێ مەییم هەرگیز نەکەی تا ماوی تۆ

ڕۆح و ماڵ و دڵ بە فیدای چاوی تۆ

ساقیا! تینووم بە مەی، تینووم بە مەی

مەست و سەرخۆشم بکەی گەر ئەودەمەی

یا بدەی کونجێ لەنێو مەیخانەکەت

تەخت و تاجی پادشا نادەم بە مەی

بێ مەییم هەرگیز نەکەی تا ماوی تۆ

ڕۆح و ماڵ و دڵ بە فیدای چاوی تۆ

ساقیا! لەو بادە چۆڕێ تێکە بۆم

من بە هوشیاریی کە بێزارم لە خۆم

دەرکی مەیخانەت لە ڕووما دامەخە

با لەوەی زیاتر پەژارە و خەم نەخۆم

بێ مەییم هەرگیز نەکەی تا ماوی تۆ

ڕۆح و ماڵ و دڵ بە فیدای چاوی تۆ

ساقیا! هاتم بە صەد ئێش و برین

دڵ غەمینم دڵ غەمینم دڵ غەمین

تۆزی ژێر کەوشت هەزار جار ماچەکەم

گەر بە کۆتا بێنی هاوار و گرین

بێ مەییم هەرگیز نەکەی تا ماوی تۆ

ڕۆح و ماڵ و دڵ بە فیدای چاوی تۆ

ساقیا! هاتوومە لات، هاتوومە لات

صەد کەڕەت عومرم بە حەیران و فیدات

دەمبەدەم بۆم بێنە بادەی تفت و تاڵ

تا شفای ئازاری سەختی من بدات

بێ مەییم هەرگیز نەکەی تا ماوی تۆ

ڕۆح و ماڵ و دڵ بە فیدای چاوی تۆ

ساقیا! چۆن دەربەرم، چۆن دەربەرم

گەر هیلاکی ناز و غەمزەی دولبەرم

خۆ بە بادەی دەستی تۆ دڵخۆشە بم

با لە مەیخانەش ئەگەر دانێم سەرم

بێ مەییم هەرگیز نەکەی تا ماوی تۆ

ڕۆح و ماڵ و دڵ بە فیدای چاوی تۆ

لەو مەیە تاڵەت نەکەی من بێبەریی

مشتەرییم من مشتەرییم من مشتەریی

پێنجوێنیی

بەرواری نوسین

4-8-2017