فلمه‌كێ كوردي ريكۆردا وه‌رگرتنا پترين خه‌لاتان ل به‌لژيكا دشكێنيت
ده‌رهێنه‌رێ كورد سه‌هيم عومه‌ر خه‌ليفه ب رێكا كورته فلمه‌كێ خوه يێ ب ناڤێ "خاكێ پاڵه‌وانا"، كو هه‌تا نها 12 خه‌لاتێن جيهاني د فه‌ستيڤالێن سينه‌مايي دا د ده‌مێ ساله‌كێ دا وه‌رگرتينه، كاري ريكوردا وه‌رگرتنا زۆرترين خه‌لاتان ل به‌لژيكا بشكينيت.
خه‌ليفه بۆ وار راگه‌هاند ، كورته فلمێ وي يێ ب ناڤێ "خاكێ پاڵه‌وانا" هه‌تا نها 12 خه‌لات د فه‌ستيڤالێن نێڤده‌وله‌تي يێن سينه‌مايي د ساله‌كێ دا ب ده‌ست خوه خستينه، ب ڤێ چه‌ندێ ژي ريكۆردا وه‌رگرتنا پترين خه‌لاتان ل وه‌لاتێ به‌لژيكا دشكێنيت كو ئه‌و ب خوه ئاكنجييێ ڤي وه‌لاتييه و ئه‌ڤ فلمه به‌رهه‌مێ به‌لژيكا- هه‌رێما كوردستانێ يه.
ئه‌و ئێك ژي دياركر، ل دووماهيا مه‌ها بۆري ، كورته فلمێ وي كاري د هه‌فتيه‌كێ دا دو خه‌لاتان ب ده‌ست خوه بێخت، ئه‌و ژي د گه‌ڕا 17 يا فه‌ستيڤالا كورته فلمێن هۆنگ كۆنگ ل باژێڕێ هۆنگ كۆنگ ل وه‌لاتێ چينێ كو خه‌لاتێ باشترين فلم د فه‌ستيڤالێ دا ب ده‌ست خوه خست و د فه‌ستيڤالا كورته فلمێن ساگيۆناي ل وه‌لاتێ كه‌نه‌دا، خه‌لاتێRio Tinto Alcan ب ده‌ست خوه خست.
خه‌ليفه‌ي ئه‌و ئێك ژي ئه‌شكرا كر "داهاتێ فلمێ من د ڤان هه‌ردو فه‌ستيڤالێن جيهاني دا، 4000 يۆرۆ بوون".
كورته فلمێ "خاكێ پاڵه‌وانا" رێڤه‌به‌راتييا هونه‌رێ سينه‌ما هه‌ولێر ب هاريكارييا حوكمه‌تا به‌لژيكا به‌رهه‌مئينايه، د مه‌ها خز‌يرانا سالا 2010ـێ دا ده‌ست ب كارێ وێنه‌گرتنا وى هاتييه كرن و د مه‌ها كانوونا ئێكێ يا هه‌مان سال دا، دووماهي ب كارێ وێنه‌گرتنا وى هاتييه.
ئه‌ڤ كورته فلمێ كوردي، به‌حسێ جه‌نگێ د نێڤبه‌را هه‌ردو وه‌لاتێن ئێراق- ئيران دكه‌ت كو بۆ ده‌مێ هه‌شت سالان به‌رده‌وام بوو و هزاران كه‌س بوونه قورباني.
ده‌رهێنه‌رێ لاو سه‌هيم عومه‌ر خه‌ليفه، خه‌لكێ باژێڕێ زاخۆيه، ل به‌لژيكا ژيانا خوه ب سه‌ر دبه‌ت، باوه‌رنامه‌يا ماسته‌رێ د وارێ ده‌رهێنانێ ل به‌لژيكا ب ده‌ست خوه ئينايه و كارێ ده‌رهينانێ بۆ هن فلمان ژي كريه.
په‌سار فايق/ هه‌ولێر
وار
- 2688 خوێندنەوە
