ڤه‌ژینکرنا بیرانینا چه‌له‌مین ژ کۆچکرنا باڤێ هه‌لبه‌ستا کوردی "جه‌گه‌رخوین"
یه‌کیتییا گشتی ئا نڤیسکار و ڕۆژنامه‌ڤانێن کورد ل سووری و یه‌کیتییا نڤیسکارێن کوردستانا سووری د ڕۆژا ۲۲.۱۰.۲۰۲٤ ده بیرانینا چه‌له‌مین ژ کۆچکرنا هه‌لبه‌ستڤانێ مه‌زن "جه‌گه‌رخوین " چالاکیه‌کێ لدارخستن.
ئه‌و چالاکی ل باژارێ قامشلۆ هاتبوو چێکرن ل مالا هه‌لبه‌ستڤانێ مه‌زن و ل ڕه‌خ گۆرا وی ، ب ئاماده‌بوونه‌ک مه‌زن ژ گه‌له‌ک که‌سایه‌تێن وێژه‌یی و هونه‌ری ڤه لگه‌ل نوونه‌رێن پارتیێن سیاسی و ڕێخستنێن ژنێ و ڕێکخراوێن جڤاکا سڤیل.
شه‌ڤبێرک ب گۆتنه‌ک ب خێرهاتنێ ده‌ستپێکر ژ ئالیێ مامۆسته فه‌واز باڤێ دلۆ ، ئاماده‌بوویان ڤه‌خوه‌ندبوو ژ بۆ سه‌کنه‌ک بێده‌نگی ل سه‌ر گیانێ هه‌لبه‌ستڤانێ بارکری، پشت ڕه به‌لگه‌فلمه‌کی کورت ل سه‌ر ژیانا هه‌لبه‌ستڤان هاتبوو خوه‌ندن ژ دانه‌ربوونا دلۆڤان چه‌تۆ و ئه‌بدولهه‌مید جمۆ.
پشت ڕه مامۆسته ئه‌بدولسه‌مه‌د مه‌هموود په‌یڤا ب ناڤێ هه‌ردوو یه‌کیتیان ڤه پێشکێش کربوو ، تێده قالا ناڤداریێن نه‌مر کربوو، و شادیا خوه ئانیبوو زمان ب ڤێ هه‌ماهه‌نگیا د ناڤبه‌را هه‌ردوو یه‌کیتیان ده، پشت ڕه برێز بۆنیا جه‌گه‌رخوین جیگرا سه‌رۆکێ یه‌کیتییا گشتی ئا نڤیسکار و ڕۆژنامه‌ڤانێن کورد ل سووری ب ناڤێ مالباتێ ئاخڤی ، سپاسداریا خوه دیار کر ژ ڤێ دلسۆزیا گه‌له‌ری ڕه ژ هه‌لبه‌ستڤان ڕه ،ئوو سپاسیا کۆمیته‌یا ڕێخستنکری و ئاماده‌بوویان کر.
ژ ئالیێ خوه ڤه هونه‌رمه‌ندێ گه‌له‌ری هسێن تۆفۆ کۆمه‌ک ژ سترانێن گرێدایی ب په‌یڤێن هه‌لبه‌ستڤانێ نه‌مر پێشکێش کر، دووڕه په‌یڤا هه‌ڤالێن هه‌لبه‌ستڤان ژ ئالیێ مامۆسته پارێزه‌ر : ئۆسمان ئۆسمان هاتبوو خوه‌ندن، تێده قالا ژیانا هه‌لبه‌ستڤان هاتبوو کرن، هه‌روها برێز هسێن شێخۆ په‌یڤا ب ناڤێ یه‌کیتییا هه‌سساریان پێشکێش کر.
هونه‌رمه‌ند ئه‌بدولره‌همان ئه‌لۆ به‌شدار ببوو ب دو سترانان ژ هه‌لبه‌ستێن جه‌گه‌رخوین یه‌ک ژ ئاوازێن خوه و ب ده‌نگێ خوه یێ زیز ، هه‌روها مامۆسته شه‌مس ئه‌نته‌ر ئه‌نداما یه‌کیتیا نڤیسکاران کوردستانێ په‌یڤه‌ک خوه ب ناڤێ کۆمیته‌یا فه‌ستیڤالا هه‌لبه‌ستا کوردی پێشکێش کر ، تێده قالا باندۆرا هه‌لبه‌ستڤان جه‌گه‌رخوین ل سه‌ر وێژه و هه‌لبه‌ستا کوردی کر.
مامۆسته و لێکۆلینه‌ر مشه‌ل ئۆسمان د په‌یڤا خوه ده قالا به‌رهه‌ما وێژه‌یی ئا ده‌وله‌مه‌ند ژ هه‌لبه‌ستڤانێ کۆچکری کر، ئا کو گیها ٥۸پرتووک د ناڤبه‌را هه‌لبه‌ست، چیرۆک، په‌ند و وه‌رگه‌ران ، و ئانیبوو زمان کو هنه‌ک به‌رهه‌م تا ئیرۆ نه‌هاتبوونه وه‌شاندن.
ئاهه‌نگ ب ده‌نگێ هونه‌رمه‌ندێ ڕێزدار سه‌فقان ئۆرکێش هاتبوو بداویکرن، ئێ کو سترانێن نشتیمانی یا ئاوازکری و ژ هه‌لبه‌ستێن هه‌لبه‌ستڤان ، ئێن ژ ئالیێ بچووک و مه‌زنان ڤه تێ دووباره‌کرن، هه‌روها برێز مهه‌مه‌د ئبراهیم هه‌لبه‌سته‌که هه‌لبه‌ستڤانێ کۆچبوویی خوه‌ندبوو ، ئێ کو ته‌ڤی ڕه‌وشا خوه یا ته‌ندرووستی خوه‌ستبوو به‌شدار ببه.
ب داویێ کۆمیته‌یا ڕێخستنکری ب ناڤێ هه‌ردوو یه‌کیتیان ڤه سپاسداریا خوه ژ هه‌می به‌شدار و ئاماده‌بوویان ڕه دیارکربوون.
ئه‌ندامێن هه‌ردوو یه‌کیتیان خه‌لکێ ژ کاتژمێرا ۱۰:۰۰سبه‌هێ پێشوازکرن، ئا مرۆڤ دڤێ نیشان بده شاگرتێن خولا نه‌هه‌مین ئا دبستانا شه‌هید که‌ریم "ئه‌ززه‌هرا" ب ئاوایه‌کی ب ڕێک و پێک هاتبوون و سروودا نشتیمانی ئه‌ی ڕه‌قیب گۆتبوون و هه‌ر که‌س ب وان ڕه ئه‌رێنیبوون.
دانه‌رکرنا ڕاپۆرێ: ڕێبه‌ر هه‌بوون
- 101 خوێندنەوە
