ھەڤپەیڤینەکە تایبەت د گەل شێوەکارێ ھونەرا سریالیزمێ عبدالغفور حسێن .
ھەڤپەیڤین : ھۆزان ئەمین- دەما ھونەرمەندەک ب ناسنامەیا خوەیا ھونەری خویا بە، لێ بێ ناسناماک کەسایەتی بە، دەما مرۆڤەک کاربە ب سەدان تابلۆیان ب ئافرینە،
و ب ھزر و دەربرینەکا ب واتە، و رەنگ و داھێنانەکی ب ھێز، وان بەرھەم بینە، مە ل ئامەدێ سەرەدانا ئەتۆلیا وی کر، و ژ بۆ کو مرۆڤ عبدالغفور حسێن ناس بكه ئه ڤ ھونەرمەندێ ڤەشارتی کو خوە ناخە بن رۆناھی ( مەدیا) و بێ دەنگ کارێ خوە دکە، دڤێ مرۆڤ تابلۆیێن وی ببینە، ئەنجاخ ئەو تابلۆ پەسنێ خوە بدن، کەرمەکن ھوون و ئەڤ ھەڤپەیڤین.
- تو دکارە خوە بدە ناسکرن ؟
ئەز ژ دایکبوونا باژارێ قامشلۆ سالا ١٩٦٤ مە، ئەم بیانی چێبوون ل سەر خاکا خوە، و ئەم بێ ناسنامە بوون، و نھا ژی ئەڤ ٥ سالان ل ئامەدێ دژیم، من دەست ب کار و خەباتا ھونەری ل دەڤەرا ئەز لێ چێبووم و مەزن بووم ، و من ل سووریێ و ل ئامەدێ گەلەک پێشەنگەھ ڤەکرنە.
- تو دکارە ژ مەرە بێژە بێ چ ھشت کو تو برسمینە، دەستپێکا تە چاوا بوو ؟
من ھەست دکر کو تشتەکی گەلەک جوان ب من رە دەردکەڤە، وەختا من ھن خێزک چێدکرن پاشە مە سروشتا ل دۆرا خوە رسماند، و ھەر پێدا چووم رسمێن من ژی پێشدە چوون، حەیا گھشت من پۆرترێ چێکرن، من ھەست دکر تشتەک من دکشینە و من ب خوە ڤە گرێ ددە، و ئەڤینداری و ئەشق د ناڤبەرا من و رسمێ دە چێبوو، و من نەما دکاری خوە ژێ دووربخم و ئەز پێڤەھاتم گرێدان.
- ئەڤ تێ وێ واتێ کو ئەڤ ھونەرا ب تەرە چێبوو ژ بچووکاتیا دەیە، ئەڤ تشت د گیانە تە خوە دا دەر، تە چلۆ ئەڤ داھێنانی پەروەردە کر؟
ئەز ب خوە بووم دیسا، ھەر تشتەک من چێدکر، ھەزا من ژێرە زێدەتر دکر، و من بێھتر پال ددا ناڤا جیھانا ھونەرا شێوەکاری، ئەڤ د گەل پێوەندیێن من ب برادەر و ھونەرمەندێن دەڤەرا مە رە وێ دەمە، و تەماشەکرنا ھونەرا شێوەکارییا دونیایێ ، بێ گومان ئەڤ ژی مرۆڤ پێش دە دبە، ھەر کەسێ کو ل کارێ من دنەری ئەز ھانددام کو ئەز برسمینم و تابلۆیێن من دبوو جھێ سرنجراکێشانا برادەر و ھەڤالان و دەردۆرا من ، ئەڤ ژی دھشت ئەز ھین بەھتر بخەبتم.
- ھونەرا تە ھلبژارتیێ ژ ناڤا جووریێ ھونەرا شێوەکاری " سوریالییە" تێ زانین بێ ئەڤ چقاس زەحمەت و نە ھەسانە مەرە د تابلۆیێن وێ تێبغێ، چما تە ئەڤ شێوە تەرجیح کر؟
من دەستپێکێ سرووشت و پۆرترێ رسماند، من ھەست دکر ئەڤ کارە تێرا من ناکە و من تشتن دن دخوەستن، تو دکارە دەربرینێ ژ رامانێن خوە ب شێواکی دن بکە ، من ھزر دکر کو گەرەک ئەز ب تشتەکی زەحمەت و گرانتر ھونەرا خوە دەرخینم، ئەڤ دبە وەک میناک، پێشکەتنا د ناڤا ھەلبەستێ دە، کو ب دەمێ رە چێبوو، چاوا ھەلبەستڤان کاریبوو خوە ژ وان قەید و گرێدانێن قافیێ و وەزن خەلاس بکە و ھەلبەستەکە نووژەن بنڤیسە، من ھەست دکر ئەڤ ھونەر ژی من ب سینۆر دکە و من نەدکاری ھەمی ئاسۆیێن د ھزر و بیرێن خوە دە پێکبینم د وێ ریێ دە، من خوەست ئەز ژ وی شێوەیێ دەربرینا کلاسیک خەلاس ببم، و ب رەنگ و جورەیکی دن کار بکم، من خەیالێن خوە د "سوریالیزمێ " دە دیتن، و من دا ناڤ، و من ھوورتر و کوورتر و دوورتر کر د ئاڤاکرنا تابلۆیێ دە و ھلبژارتنا رەنگ و وێنەیان دە، و ئەز دخوازم دەد و کولێ جڤاکا خوە ب وی رەنگی دەرخینم و بەلاڤ بکم.
- باشە ما گەلۆ، چاڤێ بینەران فێری ڤێ ھونەرێ بوویە، یان جڤاکا مە تەقەبوول دکە ؟
نا ئەڤ چورە ھونەر زۆر و گرانە، ھەر کەس نکارە زوو تێ بغێژە، ژ بەر ھونەرا سوریالی فرەھە و ڤەکریە ل سەر ھەر ئالی، نە وەک تو ل تابلۆیەکێ کو گول و دار و سروشت تێ دە ھەبن، ئەڤ ھەر کەس دکارە ژ خوە رە شرۆڤە بکە، لێ گەرەکە مرۆڤ ھنەکی ل گۆرا جڤاکا خوە ژی تەڤبگەرە، ھەگە مرۆڤ تابلۆیێن سوریالیست ژی چێکە گەرەک ل گۆر رادەیا جڤاکی وی بن، تو دنەرە بێ جڤاکا ئەوروپی گھشتیە چ رادێ، ھونەرمەندێن وان تابلۆیێن گەلەک زەھمەت چێدکن، لێ رولا ھونەرمەند ژی ئەوە کو ھندەکی ھەول بدە جڤاکا خوە ژی راکە، و وان فێر بکە کو تابلۆ نە تەنێ ئەڤ تشتێن بەر چاڤا نە، لێ وەختا کو مرۆڤ ھەست بکە کو ئەو شێوە نەما دەربرینە ژ ھەستێن وان دکە، مرۆڤ پال ددە ل تشتن نوو بگەرە، ئەڤ د ئەوروپا دە چێبوو و د گەلەک قووناخان دە دەرباس بوون حەیا گھشتن ڤێ رادەیێ و ب سەدێن سالا درێژ کر.
- ما تو دبینە کو ھونەرمەندەک، خوە گرێ بدە ب دبستانەک ھونەری ، ما ئەڤ پێوستە تا کو ھونەرا خوە ب ھێزتر بکە؟
نا بێ گومان، مرۆڤێ کو ب ڤی کاری رادبە، ل گۆرا من گرینگە کو ناسناماکێ ژ تشتێ کو پێشکێش دکە چێکە، لێ ئەڤ نایێ وە واتێ کو تشتێن دی چێنەکە، لێ بەلێ گرینگە خوە بزانبە بێ د چ ریێ دەیە و خوە د چ دە دبینە.
- ئەم دخوازن د دەربارێ چالاکیێن تە دە، ھن ئاگاھیان وەربگرن، تە چەند پێشەنگەھ ڤکرنە، و ھ ود؟
من ل سووریێ گەلەک کار دکر، من گەلەک تابلۆ چێدکرن، و مە گەلەک پێشەنگەھ ژی ڤەدکرن، لێ ئاستەنگی ھەبوون ژ ھێلا سیاسی دە وەختا کو مەرە ھەست ب زولمێ دکە و جڤاکا مە نە ئازاد بە، و رێژیمەک کو ھەزا دەرھێنانێیێ ناکە و ئاستەنگی ژ مە رە چێدکرن و ھەتا دگۆتن ئەڤ ئەرە یان ئەڤ نا، بێ گومان ئەڤ ژ بۆنا من جھێ نەخوەشیێ بوو ، ھونەرمەند گەرەکە ئازاد بە و بێ بەند و قەید کار بکە ، و ژ ئالیێ ئابووری ژی ئاستەنگی ھەبوون، من نەزیکی ٥٨ پێشەنگەھا ل سووریێ ب تەڤاھی ڤەکرن ژێ ٣٨ێ من ب خوە بوون ، و من ١٠ خەلات ژی وەرگرتنە، یەک ژێ د سالا ٢٠٠٥ان من خەلاتا یەکم ل سەر ئاستێ سووریێ وەرگرت، پاشێ ئەز ھاتم ئامەدێ ژ بۆ کو ئەز کاربم کارێ خوە ھین خورتر و مەزنتر لێ بکم، من ٨ پێشەنگەھ ل ڤر ژی ڤەکرن لێ من دیت ئەڤ ھونەر بالا خەلکێ پر ناکشینە، ، ئەز ھەول ددم کو ئەز ڤێ ھونەرێ بدم دۆرا خوە و بەلاڤ بکم، و دخوازم خەلک بێن و ببینن، پرسیارا ژ من بکن ل سەر واتا ڤێ تابلۆیێ یانا دی، من ژ بەر ولۆ کۆمەک ژ خوە رە چێکریە ژ ١٢ کەسان پێک تێ، ئەز وان فێر دکم، ژب ئۆ ئەو ژی ھدەک دن فێر بکن.
- د داویێ دە ، تو چ دخوازە بێژە؟
ئەز ھەز دکم وەرم ھەرێما کوردستانێ و ھونەرا خوە پێشکێش بکم، ئەز دبھیزم تەڤگەر و لڤەکە باش ھەیە ، و گەلەک ھۆل و جھێن باش ھەنە بۆ پێشەنگەھا، و چالاکیێن ھونەری باش ھەنە، ھەگە دەلیڤە ھەبە ژ دەزگەھ یان چ ئالیەک پێوەندیدار من داوەتی ور بکن، ئەز ب کێفخوەشی د گەل تابلۆیێن خوە ئامادە مە.
روزناما ئفرو – هةذمار 1030 – 20-9-2012
-----------------------------
- 4660 خوێندنەوە
