ھەڤپەیڤین ب نڤیسکار محەمەد رۆناھی رە .

ھەڤپەیڤین : هوزان ئة مين... محەمەد رۆناھی نڤیسکار و وەشانگێرەکی کوردە. د 1979 ان دە ل پیرانا ئامەدێ ژ دایکبوویە. د 2003  یان دە ل زانینگەھاین ئينونو بەشا جڤاکناسییێ خوەندیە. د مالپەرا ھابەردیارباکر، کۆڤارا W، کۆڤارا رەوشەن، کۆڤارا زەند و چرووسکێ، و ھەر ھەفتێ قونجکەک وی د رۆژناما ئازادیا وەلات دە ھەیە.

د 2009 ان دە ب ناڤێ وەشانخانەیا " رۆناھی" وەشانخانەیەک دامەزراندیە. د 2010 ان دە رۆمانا خوەیا ب ناڤێ "بەندەوارێن ئادارێ " دەرخست، د سالا 2011 ان دە ژی چیرۆکێن وییێن ب ناڤێ " دارستان " ژ وەشانخانەیا رۆناھی دەرکەت. مە دەلیڤە دیت ل سەر نڤیسکاری و خەباتا وی و ھەر وەھا ل سەر  وەشانخانەیا وییا " رۆناھی" چەند پرسان بکن و ب کێفخوەشی بەرسڤا مە دا ب سپاسی .  

 1-محەمەد رۆناھی ، زێدەباری مە ل ژۆر دیار کریە، د دەربارێ ژیانا تە دە تو چ دخوازە زێدە بکە؟

د دستپيكى ده ئه زى وه سپاس دكم بۆ ڤێ ھەڤپەیڤینێ،  ژ بلی ڤان تشتێن کو ھاتنە گۆتن ئەڤ سێ سالن ل ناڤەندا چاندێیا ئاکادەمیا جەگەرخوینێ مامۆستەتیا وێژەیا کوردییا کلاسیک دکم.

2-تە کەنگێ و چاوا دەست ب خەباتێن نڤیسکاریێ کریە؟

ب ئاوایەکی ھشمەند یەکەم جار من ل زانینگەھێ دەست ب نڤیسێ کر. دەستپێکا نڤیسینێ ژی ھەلبەست بوون. د سالا 1999 ان دە ھەلبەستێن من خەلاتا یەکەمینیێ گرتن و پشترە من دەست ب نڤیسێن لێکۆلینی کر لێکۆلینێن کو من ل سەر فەلسەفە، دیرۆک و جڤاکا کوردان کرن من ل کۆڤار و رۆژنامەیان ھاتن وەشاندن. پشترە ژی رۆمانا من دەرکەت و ڤێ داویێ من کۆمەلەیەکە چیرۆکان وەشاند.

3-ھەتا نھا چەند بەرھەمێن تە ھەنە، ناڤ و ناڤەرۆکا وان چنە ؟

ھەتا نھا رۆمانەکە من و بەرھەمەکە منا چیرۆکان ھەیە. و وەکە وەرگەر ژی من سامەد بەھرەنگی ژ فارسی وەرگەراندیە کوردی. ناڤە رۆمانا من “بەندەوارێن ئادارێ”یە. د ڤێ رۆمانێ دە من خوەستیە ئەز ژیانا مالباتەکە کوردەوار لێ ئاپۆلیتیک ڤەبێژم. چاند و ژیانا مالباتەکە کوردەوار چیە و چاوایە؟ ژیان ل کوردستانێ ب چ رەنگییە؟ ھێڤی و بەندەواریێن جڤاکا کورد چ نە. من خوەستیە ڤان خالان زەلال بکم د رۆمانا خوە دە. بەرھەما دویەم چیرۆکە. ناڤە بەرھەمێ “دارستان”ە. ب تەڤاھی ژ ھەشت چیرۆکان پێک تێ. چیرۆکێن دارانن. د ھەر چیرۆکەکێ دە لەھەنگ من دارن و ھەر دارەک برینەکە کوردستانێ ڤەدبێژە.

4-تو وەشانگەریێ ژی دکە، تو دکاری وەشانخانەیا رۆناھی ب مە بدی ناسکرن؟

مە وەشانخانەیا خوە د 2010 ان دە ڤەکر. وەشانخانەیا مە ل ئامەدێ یە و تەنێ ب کوردی وەشانێ دکە. ب زمانەکی دن ئەم کتێبان ناوەشینن. د ناڤ دو سال و نیڤان دە مە 35 پرتووک وەشاندن. پرتووکێن مە بێترێ خوە ئەدەبی نە. لێ لێکۆلین و زارۆک ژی قادەکە مەیا تایبەتە د وەشانێ دە.

5-تە ژ بەر چ ئەگەری دەست ئاڤێتە کارێ وەشانگەریێ و ئەرمانجا تە چیە؟

ئا راستی ئەز دکارم ل ڤر گەلەک تشتان بێژم و گەلەک سەدەمان بژمێرم کو من دەست ب وەشانگێریێ کر. لێ پێشیا ھەر تشتی ئەز دلدارێ پرتووکانم ژ زارۆکاتیا خوە دە. و تو کارەک نکارە ب قاسی ڤی کاری کەلەجانێ بدە من. ژ بەر کو من ھم ژ ڤی کاری ھەز دکر ھم ژی ئەز شارەزا بووم د ڤێ قادێ دە من باوەری ئانی کو ئەزێ کاربم تشتێن باش بافرینم د ڤی واری دە. و ئەڤ ژی دێ ژ ئالیەکی دە ببە دەولەمەندیا نەتەوی ژ ئالیەکی دە ژی دێ ببە خزمەتەکە خوەشک ل سەر ناڤێ من. ژ بەر وێ یەکێ من دەست ب ڤی کاری کر.

6- مەرجێن وە چنە ژ بۆ چاپکرنا بەرھەما نڤیسکارەکی، و ھوون چ بابەت و مژاران ھلدبژێرن د بەرھەمان دە؟

ئا راستی مەرجێن مە نە گەلەکی باشن لێ دگەل ڤێ یەکێ ژی ئەم تەنێ دخوازن د کارێ خوە دە پرۆفەسیۆنەل بن. ئانگۆ وەشانخانەیەکە تورکان یا ھەری مەزن ب چ ئاوایی کارێ خوە دکە دڤێ ئەم ھەری کێم وەکە وێ ئان ژی ژ وێ باشتر بکن کارێ خوە. دەستوورا مە ئەڤە. د ھلبژارتنا بەرھەمان دە سینۆرەکی بابەتان تونەیە ل جەم مە. بابەت دکارە ھەر تشت بە. لێ ب شەرتێ کو ئاستا وێ بلند بە. ھەلبەت د وارە بابەتان دە پووتەپێدانێن مە ھەنە لێ وەکە من گۆت بەریا ھەر تشتی دڤە ژ مژارێ بێتر ناڤەرۆک و ڤەگۆتن د ئاستەکێ دە بن.

7- ھوون چاوا دکارن وەشانخانەیێ راگرن ! گەلۆ رێژەیا خوەندنا زمانێ کوردی د زێدەبوونێ دەیە، کو ھوون کاربن مەسرەفا وان پرتووکان ب فرۆتنێ دەرینن؟

دەبارا وەشانخانەیێ مخابن کو تەنێ ب کتێبان نابە. ئەز د ھەمان دەمێ دە مامۆستە مە و ژ راتبێ خوە ژی دخم سەر دا کو ئەز بکارم ڤێ خەباتێ بەردەوام بکم  .

روذناما وار