رۆمانا مریه‌ما كورد ل قاهیره‌یه ب عه‌ره‌بی هاته به‌لاڤكرن
ژ وه‌رگێرانا نڤیسه‌رێ كوردێ دووره‌وه‌لات سامی ئه‌لحاج و ل ڤان رۆژێن بۆری، رۆمانا "مریه‌ما كچه‌ك ز زه‌مانه‌كێ دی" یا رۆماننڤیسێ كورد سه‌بری سلێڤانه‌یی ب زمانێ عه‌ره‌بی ل قاهیره هاته چاپكرن.
رۆماننڤیس سه‌بری سلێڤانه‌یی ب ئاژانس و رادیۆیا په‌یامنێر راگه‌هاند، رۆمان د چاپا خویا عه‌ره‌بی دا ب شێوه‌كێ ناوازه ده‌ركه‌فتیه و ناڤه‌رۆكا وێ نهینی و ڤه‌شاتیێن جڤاكێ مه ئاشكرادكه‌ت و ده‌ربرینێ ژ ده‌رزێن گیانی روحی و خه‌ون و شكه‌ستنان ژ هیڤی و ئاشۆپێن جڤاكێ رۆژهلاتێ دكه‌ت.
ئیماژه ب وێ چه‌ندێ ژی دا، قاره‌مانا رۆمانێ بریارا ئاشكراكرنا راستیێ دده‌ت، نه‌خاسم ئه‌وێن ل پشت ماسكان دهێنه به‌رزه‌كرن.
سلێڤانه‌یی ئه‌و ئێك ژی دیاركر، ل پشت ره‌وشت و تیتالێن كه‌ڤنار كو جارنا دبنه فاكته‌رێ پێشێلكرنا مافان و تێكدانا روحێ هه‌تا وی رادده‌یی كو ناڤ و رامان دهێنه گهۆرین، ئێدی گهۆرین و قێری بێهۆده دبن و هیڤی ژی دبیته هه‌ڤ واته بۆ خوراده‌ستیێ و دۆماهیێ رۆمان ب زمانه‌كێ ساده و ساكار ژلایێ وه‌رگێری ڤه هاتیه عه‌ره‌بیكرن ب شێوه‌كی دێ شێی بێژی رۆمان ب زمانێ عه‌ره‌بی هاتیه دارشتن نه‌كو وه‌رگێران.
رۆماننڤیسی گوت "په‌یڤ و زاراڤێن ناڤه‌رۆكا ڤی پرۆژێ توره‌یی ب هۆستایی و ره‌هوانی هاتینه وه‌رگێران و ب ته‌كنیك و تیمه‌ك خوسه‌ر هاتیه ئه‌نجامدان، ئاستێ به‌رز و بلندێ وه‌رگێری نیشا دده‌ت و زێده شاره‌زایی یا وی د ڤی واریدا دسه‌لمینیت".
ده‌زگایێ "ئافاق عاله‌میه" یا مسری ب كارێ چاپ و به‌لاڤكرنا ڤێ رۆمانێ ب زمانێ عه‌ره‌بی رابۆیه.
یه‌نایه‌ر (PNA)- ئیسماعیل تاهیر/ پ. ف
- 2491 خوێندنەوە
