مەسعود خەلەف: ھەلبەست وەلاتەکی بێ سەرۆکە!...ھەڤپەیڤین: دەمھات دێرکی

رۆژنامەڤان و ھەلبەستڤانێ کورد مەسعود خەلەف ل سالا ١٩٨١ ئان ل رۆژاڤایێ کوردستانێ ل گوندێ خەزنایا ب سەر باژارێ قامشلۆ ڤە ژ داییک بوویە.

نڤیسکارێ کورد مەسوود خەلەف ل گوندێ خوە قۆناخا خوەندنا سەرەتایی تەمام دکە و ل باژارێ قامشلۆ قۆناخا ئامادەھی ب داوی دکە. لێ، کەسایەتیا مەسعود خەلەف و پێنگاڤێن وییێن رۆژنامەڤانی و ھەلبەستڤانیێ ب سەرێ خوە رۆمانەکە و تەنێ ئەو دکارێ وێ رۆمانێ بنڤیسە. ئەو ل گوندەکی گرێدایی خاکێ، وەلاتپارێز، جانگۆر ژبۆ وەلاتێ خوە ژداییک بوویە. چیرۆکا کەسایەتیا وی و پێنووسا وییا ئافرینەر ژ ڤر دەستپێدکە. د ناڤا مەرجێن دژاورترین دە، جارنە بەر لێڤا مرنێ، جارنە ڤەگەرا ژ مرنێ، جارنە ھلگرتنا داربەستان..پێنووسا وی، کارێ وییێ راگھاندنێ پێشکەتیە و خوە گھاندیە ئاستەکە بلند. پشتی قۆناخێن ئاشووتێن بەرفینی و بارانێن مرنان، ل رادیۆا دوھۆک دەنگێ کوردستان دەست ب کار دکە و بەرنامێن سەرکەفتی ئامادەکە و پێشکێش دکە.

مەسعود خەلەف ئەندامێ یەکیتیا نڤیسکارێن کورد تایێ دوھۆک،ئەندامێ سەندکا رۆژنامەڤانێن کوردستانێ و کۆمەلا نڤیسکارێن رۆژاڤایێ کوردستانێیە. د دەستەیا نڤیسەرێن کۆڤارا نووبوون دە جھ دگرت. ل سالا ٢٠٠٩ ئان د وارێ ھەلبەستێ خەلاتا یەکەمین وەرگرت ل باژارێ دوھۆک. بەرھەمێن وی وەکە پرتووک چاپکری ئەڤن: ئاخافتنا بەری مرن ژ ئالیێ وەشانێن تەڤن ڤە ھاتیە چاپکرن، ئاریانا سینۆرێن دوور ژ ئالیێ یەکیتیا نڤیسکارێن کورد تایێ دوھۆک ڤە ھاتیە چاپکرن، ھەر وەھا کەلھا ئەردێ ل سالا ٢٠١٠ ئان چاپ بوویە. ھێژایی گۆتنیە رۆژنامەڤان و ھەلبەستڤان مەسعود خەلەف ئەڤ نێزیکی ھەفت سالن ل وەلاتێ سویسرا دمینە.

•  برێز مەسوود خەلەف، ژ کەنگی وەرە تە دەست ب نڤیساندنا ھەلبەستێ کریە، ھەلبەستێن تەیێن ژ ئێشێ، ژ برینێ، ژ ئەڤینێ، ژ رۆناھی و تارستانێ گرێدانێ خوە ب گوند و ژیانا تە بۆراندی ڤە ھەیە؟
•  چ جاران باوەر ناکم کو ژیەکی ھەلبەستێ ھەبە، ئانکو مرۆڤ ھەبوونا ھەلبەستێ ب دەمەکی دەستنیشانکری دیار بکە، ھەلبەست دەما کو مرۆڤ بەھسا ھەلبەستێ دکە، مرۆڤ بەھسا جیھانا ھەست، نەست و کەفتوولەفتێن د ناخا مرۆڤی دە دکە، ھەر کەسەک ھەلبەستڤانە و ھەر کەسەک نە ھەلبەستڤانە، ھەر کەسەک دەما کو رۆندکەک ژ چاڤێن وی دھێتە خوار و نەشێ دەربرینێ ژ وێ رۆندکێ ب ریا نڤیسینێ بکە، د ناخێ وی دە ھەلبەستەک دھێتە نڤیسین و بەرووڤاژی ڤێ یەکێ ژی مرۆڤ دکارە بێژە. ھەلبەست نڤیسین گرێدانا خوە ب ھەر رابوون و روونشتنەکی مە ڤە ھەیە، ب ھەر سەرکەفتن و بنکەفتن، ب ھەر خوەشی و نەخوەشی، لەوما ئەو ھێزا خوە ژ جڤاکێ دگرە، ژ کەتوارێ مرۆڤ تێدا بووری و دبوورە وەردگرە. ئەز ھەلبەستەکم، د چاڤێ دەمی دە، بێناھیێن ئاسیمانەکی کەچەل، د ئەرشێ خوەداوەندێن نڤستی دە بانگەوازیا شیاربوونێ ددم.

•  ل گۆری مەسعود خەلەف جیھانا ھەلبەستێ زەھمەتە یان ژییا راگھاندنێ و مەسعود خەلەف پرتر خوە د کیژان جیھانێ دە دبینە؟

•  بێ گومان بەرواردی ناھێتە کرن و ھەر کارەک رێباز و زاگۆن و یاسایێن خوە ھەنە، لێ ھەلبەست ژ ڤان ھەموویان دوورە، ھەلبەست جیھانەکە بێ دەریە، وەلاتەکی بێ سەرۆکە، لەوما دبێژم، ھەر کەس دکارە ھەلبەستێ بنڤیسە، لێ ھەر کەس نکارە گۆتارەکی شرۆڤەکاری بنڤیسە.

•  گەلۆ چ جوداھی د ناڤبەرا ھەلبەستا ل سەر ئاخا وەلات و ل سەر ئاخا خوربەتێ ھەیە د وارێ ھەست، روھ و دیتن دە؟

•  وەکو مرۆڤ بەھسا دایکێ و زردایکێ بکە، وەکو مرۆڤ بەروارەدیا بھارێ ب زڤستانێ رە بکە. وەلات رھە، گیانە و دلە، لەوما ھەگەر تە ئەڤ ژ دەست دان، کەواتە تو ھەلبەستەکە نیڤمری دنڤیسە.

•  ل سەر دەما ئەم تێ دە دژین، ھەلبەستنڤساندن د ناڤا کوردان دە گەلەک بەربەلاڤە، مەسعود خەلەف ڤێ رەوشێ وەک پێشکەتن دبینە یان بەرووڤاژی، ھەر وەھا ئەم دکارن بێژن ھەلبەستا کوردی گھایە ئاستا ھەلبەستا جیھانێ؟

•  خوەزی ھەر کەسەکی شیان ھەبە، بنڤیسە، نە مەرجە کو ھەلبەست بە، ھەر ژانەرەک، ھەر شاخەک ژ وێژەیا کوردی کو بھێتە نڤیساندن، ئەو سەرکەفتنە. بریار ل سەر داین مرۆڤ دکارە ژ بۆ موخلا جڤاکا خوە بخوە بھێلە، ئەو باشترین دادوەرن کو ھلبژارتنا چێژا وێژەیێ بکن. ل ئالیەکی دی، ھەلبەست، چیرۆک، رۆمان، شانۆ، سینەما، و ھایکۆیا کوردییێن کو دھێنە نڤیساندن، دکارم بێژم کو د ئاشتایێن جیھانی دە نە و زێدەتر، لێ بێخوەدانیەک ھەیە، ئەم سێوی نە، لەوما کەسەکی ھای ژ مە نینە.

•  برێز مەسعود خەلەف. ب سالانە تو د ناڤا راگھاندنا کوردی دەیی، ب چاڤێ مەسعود خەلەف راگھاندنا کوردی د چ ئاستێ دەیە؟

•  ئەز ب خوە وەکو کەس گەشبینم ب راگەھاندن و ئاستا کو ئیرۆ ئەم وەکو کورد گھشتنێ دە، ھەکە ئەم بەروارەدی ل گەل چاخێن بەری خوە بکن، ئیرۆ ئەم د ئاستەکی ھەری باش دە نە و راگەھنادنا کوردی ژی رۆلەکی گەلەک باش دبینە.

•  گۆتنا داوی
•  ژ دل سپاسیا وە دکم، بۆ ڤان پرسێن جان سڤک، و سپاسیەکە بێ سنۆر ژ بۆ ھەمو ھەڤال کارمەندێن کو ئەڤرۆ ل رۆژناما ئەڤرۆ کار دکن. ھەر وەسا سلاڤێن خوە ژ بۆ باژارێ خوەیێ کو چ جاران نەشێم ژ بیر بکم، ژ بۆ دوھۆکا رەنگین رێ دکم و دبێژم، پاراستی بی دوھۆک و ھەر و ھەر بووکا کوردستانێ بی.

رۆژنامە ئەڤرۆ

ھەژمار: ٣٢٧٤

١٦.١.٢٠٢٣