![](https://www.semakurd.net/sites/default/files/imagecache/400xY/gara-sazkar.jpg)
گارا سازکار هونەرمەندی گۆرانیبێژ، ئەلبوومێکی نوێی گۆرانیی بەناوی "بیریا تە دکم" بە سپۆنسەری تۆڕی میدیایی رووداو بڵاوکردەوە.
ئەلبوومەکە لە 10 تراکی گۆرانی پێکهاتووە و گۆرانییەکان لە ئاوازی سازکار خۆیەتی و بەشێکی زۆری تێکستی گۆرانییەکانیشی نووسیوە.
یەکێک لە تراکەکانی نێو ئەو ئەلبوومە بەناوی "عەشرەت هاوارە"یە کە لە نووسینی پیرەمێرد شاعیری کوردە و بەشێوەی ڤیدیۆکلیپ بڵاوکراوەتەوە.
سازکار لەبارەی ئەم بەرهەمە بە رووداوی راگەیاند "بەرهەمی عەشرەت هاوارە، گۆرانییەکە بۆ یادکردنەوەی رووداوێکی گرنگە لە مێژووی خەباتی سیاسی کوردستاندا، ئەویش پەڕینەوەی مەلا مستەفا بارزانی و هەڤاڵانی بوو لە رووباری ئاراس لە 18ی حوزیرانی 1947 و بەڕێکەوتنیان بۆ یەکێتیی سۆڤێتی پێشوو".
ئەو هونەرمەندە جگە لەو گۆرانییە، گۆرانییەکی دیکە بەناوی "جانا منی" بەشێوەی ڤیدیۆکلیپ بۆ هەوادارانی بڵاوکردووەتەوە کە لە تێکستی جگەرخوین و بەشێکی دیکەیش لەلایەن چەلەبی حاجۆ نووسراوە.
سازکار لەبارەی گۆرانی "جانا منی" رایگەیاند، لە 1985 لەسەر کاسێت تۆماریکردووە و لەسەر داخوازی هەوادارانی بە میوزیکێکی نوێ دووبارەی کردووەتەوە. تانجۆ دۆمان کاری دەرهێنانی بۆ ڤیدیۆکلیپی "عەشرەت هاوارە" و "جانا منی" کردووە و لە دانیمارک وێنەگیراون.
گارا سازکار خەڵکی باشووری کوردستانە و لە 1980 بووەتە پێشمەرگە و لە هەمان ساڵدا دەستی بەکاری هونەری کردووە، ساڵی 1981 روویکردووەتە رۆژئاوای کوردستان و هەشت بەرهەمی لەسەر کاسێت بڵاوکردووەتەوە، ساڵی 1985 روویکردووەتە ئەوروپا و ئێستا لە دانیمارک دەژی و خاوەنی چەندین ئەلبووم و گۆرانییە.
رووداو - پەسار فایەق