ھونەرمەند حسێن صالح (ھونەرا کوردی خوە ژ ترسا ونداکرنێ خەلاس کر يه)

مە ل کامپا دۆمیس ئا ئاوەرەیێن کوردێن رۆژاڤا سەرەدانا وی کر ، و د گەل تەمبوورا خوە ھات، و ب چەند سترانان ئەم کێفخوەش کرن، و ژ بۆ رۆژناما وار ب ڤی ئاوایی بەرسڤ دا.

ھەڤپەیڤین : ھۆزان ئەمین

- د دەستپێکێ دە ئەم ب خێرھاتنا تە دکن ، ئەم دخوازن تو خوە ب خوەندەڤانان رە بدێ ناسکرن ؟

بەلێ ئەز ژی سپاسیا وە دکم، ئەز ژ باشوور رۆژاڤایێ کوردستانێ مە، ل باژارێ دربێسیێ د سالا 1971 دە ھاتمە دونیایێ، من ژ ب چووکاتیا خوە دە ھەستێ ھونەریێ ژیان کر، ژ بەر کو ئەز ژ بنەمالەکە دەنگبێژ و ھونەرمەندم، من یەکەم بەرھەما خوە د سالا 1989دە تۆمار کر، و ب فەرمی ئەز کەتم قادا ھونەرێ و ھاتم ناسکرن.

- چ رفتارێن سەرکی بوون کو تە پالدان ناڤا قادا ھونەرێ؟

بەلێ ئا یەکێ ئەز ژ مالباتەکە دەنگبێژ و ھونەرمەندم ژ باڤ و کالێن خوە دە، باڤێ من سازڤان بوو ھەروەھا خالێن من، و بێ گومان ھونەرمەند زوبێر صالح برایێ من یێ مەزن و ناڤدارە و رولا وی گەلەک بوو کو ئەم ب خورتی رێچ و شۆپا ھونەرێ باژۆن، ژ بلی ڤان تەڤان ژی بەندۆرا موسيقا ھونەرمەندێ مەزن سعید یوسڤ ژی گەلەک ل سەر من ھەبوو، و ب تایبەتی د بەوارێ ژەنینا بزقێ، و ژ زارۆکاتیا خوە دە من وی وەکە مامۆستە ژ خوە رە دیت، ئەو تشت د ھونەرما من دە خویايه، ھەیانی د ناڤا ستران و ئاوازێن من ژی ستایلا سعید یوسڤ دیارە.

-پەیڤ و ئاوازێن سترانێن خوە تو ب خوە چێدکە، یان ئێ کێ نە؟

ئەز نە ھەلبەستڤانم لێ من گەلەک ستران چێکرنە، و ھەر وەھا من ژ پەیڤێن گەلەک شاعران خوەندنە، وەکە میناک ( خەمگینێ رەمۆ-ئەرشەڤێ ئۆسکان- فتح الله حوسەینی…..ھود(

-ئەم د دەربارێ ھاتنا تە دە بۆ ھەرێما کوردستانێ دخوازن ناسبکن ب چ مەرەمێیە؟

بەلێ، ب راستی ئەز ب سەردان ھاتمە، و ژ بۆ کوردێن رۆژاڤا خوەنە ئەم وەرن و ئالا رەنگین ھلدایی ل سەرە چیا و بانان ببینن، و ئەز گەلەک شا مە کو ئەز خوە ل وەلاتێ خوە یێ ئازاد دبینم، ل گەل ڤی سەدەمی، ئەز حەز دکم خوە ل ڤر ب رێکا راگھاندن و میدیایێ خوە بدم ناسکرن و پێوەندیێن خوە خورتر بکن، تا کو ئەم دەنگێ خوە بگهینن ھەزکرێن ھونەرا کوردی.

-وەک ئەم دزانن ئەڤرۆ شۆرەشەک ل سووریێ ھەیە، و مەرجێن زەحمەت ل وێ دەڤەرێ ھەنە، د وارە ھونەری دە رەوش ل ور چاوایە..؟

ب راستی ژیێ ڤێ شوره شێ نە گەلەکە، تەڤی کو خەلکێ مە ترسا ژ رێژیمێ ھین دەرباس نەکریە، لێ گەلەک گاڤێن باش ژی ھاتنە ئاڤێتن، و گەلەک ھونەرمەدێن ھێژا ھەنە و خەباتەک باش تێ کرن، مە گەلەک قوناخێن ترسناک و زەحمەت دەرباس کرن، و ئەم کارن بێژن کو ھونەرا کوردی خوە ژ ترسا ونداکرنێ خەلاس کر يه، و خوە گھاند ئاستەکە بلند، تەڤی کو هن کەس خوە خستنە ڤێ قادێ و دخوازن خوە ب رێڤە ببن لێ نە کارێ وانە و دبە کو گەلەک کەس کێمایێ دکن د حەقێ ھونەرێ دە، لێا گرینگ ئەوەێ کو بەر خوە بدە و بەردەوام بکە، و ھەر دەم تشێ رسەن و ھێژا ب سەر دکەڤە.

-ھوون دەبارا خوەیا ژیانێ ل وێ دەڤەرێ چاوا ب رێڤە دبن؟

ژ بلی کارێ ھونەری ت کارێ دن مە نە کریە، و مخابن ژی ئەو کەسی کو ل سەر ڤی کاری دمەشە وێ ھەردەم خزان و ھەژار بمینە، و نھا د دەست من دە دو ئالبۆم ھازرن لێ ژ بەر کێم دەرامەتی ئەز نکارم بەلاڤ بکم، و ھین ل دەف مە ئەو دەزگەھێن کو کاربن ڤی کاری راگرن و بەلاڤ بکن چێنەبوونە.

-چەند بەرھەمێن تە ھەتا نھا بەلاڤ بوونە؟

من ١٢ بەرھەم تۆمار و بەلاڤ کرنە، ھەر بەرھەمەک ژ ئا دن چوداترە، و ئەڤ ژ بلی بەشداریا مە د داوەت و شەھیانا دە، و ئەز ھێڤی دکم کو سازی و دەزگەھێن ھونەری دەنگێ مە ببھیزن و کاربن ب رێکا وان دەلیڤێ ببینن و ھن بەرھەمێن دن ژی تێخن خزمەتا گەلێ خوە.

Rojnama War

--------------------------