وەڵامی بۆچوون بدەوە

ل ژێر درووشمێ دهۆك پایته‌ختێ زیندیكرنا هلكه‌فتێن نه‌ته‌وه‌یی یه‌ و ب چاڤدێریا دكتور كاوه‌ مه‌حموود وه‌زیرێ ره‌وشه‌نبیری و لاوان بریار ئه‌وه‌ ل رۆژێن (25 و 26) ی ڤێ هه‌یڤێ فیسته‌ڤالا شوره‌شا ئاگری و جه‌نه‌رال ئیحسان نوری پاشا ژلایێ رێڤه‌به‌ریا گشتییا ره‌وشه‌نبیری و هونه‌ر و وه‌رزش و لاوان ل دهۆكێ و هه‌ردوو رێڤه‌به‌ری یێن سه‌نته‌رێن ره‌وشه‌نبیری و تیپێن هونه‌ری و چاپ و به‌لاڤكرنێ ل هۆلا ئێكه‌تیا نڤیسه‌رێن كورد، دهۆك بهێته‌ گێران.

ئیسماعیل تاهر ئه‌ندامێ لیژنا بلندا فیسته‌ڤالێ راگه‌هاند كو "بۆ ئاماده‌بوونێ د په‌نه‌لێن فیسته‌ڤالێ دا ژماره‌كا شاره‌زا و پسپۆران ل ناڤ كوردستانێ و ده‌رڤه‌یی كوردستانێ هاتینه‌ داخوازكرن و فیسته‌ڤال ل سه‌ر چار روونشتنان هاتیه‌ به‌لاڤكرن و تێدا نه‌هـ سمینار دێ ل سه‌ر مێژۆیا شۆرشا ئاگری 1926 – 1927 و خه‌بات و تێكوشانا جه‌نه‌رال ئیحسان نوری پاشا هێنه‌ پێشكێش كرن ".

هه‌ر وه‌سا گوت "پرتووكه‌ك ب ناڤێ (سالێن په‌نابه‌ریێ ژ ژیانا ئیحسان نوری پاشا) یا نڤیسه‌ر موسه‌دده‌ق توڤی ژ لایێ رێڤه‌به‌ریا چاپ و به‌لاڤكرنێ ڤه‌ ل دهۆكێ چاپكرن دێ د رۆژانێن فیسته‌ڤالێ دا هێته‌ به‌لاڤكرن و به‌رنامێ فیسته‌ڤالێ ژ بلی كۆڕ و سمیناران فلمه‌كێ دیكومێنتی و كلیپه‌كێ هونه‌ری ژی همبێز دكه‌ت دگه‌ل ڤه‌گێرانا بیره‌وه‌ریێن ژماره‌كا شاره‌زا و ڤه‌كۆله‌ران دگه‌ل جه‌نه‌رال ئیحسان نوری پاشا ".

هه‌ر وه‌سا ئیسماعیل تاهر گوت ژی "ل سپێده‌هیا رۆژا ئێكێ یا فیسته‌ڤالێ پیشانگه‌هه‌كا وێنێن فۆتوگرافی و دیكومێنتێن شۆرشا ئاگری و جه‌نه‌رال ئیحسان نوری پاشا و چه‌كدارێن شۆرشێ دێ ل هۆلا پانۆراما ئازادی ل دهۆكێ هێته‌ ڤه‌كرن و برگه‌كا تایبه‌ت دێ بۆ پرتووكا سالێن په‌نابه‌ریێ ژ ژیانا ئیحسان نوری پاشا هێته‌ ته‌رخانكرن ".