![](https://www.semakurd.net/sites/default/files/imagecache/400xY/arshev_1_0.jpg)
Hawara helbestan
Ez nema…
terîşa bi dara xwezeyan ve
dialînim
nema kirasê miradê
li bejna xwe dikim
Nema ez li dora goristana
dizîvirim û li ber serê weliyan
rondikan dibarînim
Ez nema pê xwas diçim
Amojgeha xwestekan
Ezê tirhikan ji dara mejî û
hestan bibirim
Ezê sînorê asê di navbera
xwe û xewnan de
ava bikim
Ezê wisa bijîm
Bê xwestek
Bê xewn û
di rondikê helbestan de
van wêjeyan bifirînim:
Jiyanek serbixwe
Razanek bê şêlupêl
Koçberiyek bê kelem û
Mirinek bê mirin.