![Hesen Silêvanî Hesen Silêvanî](https://www.semakurd.net/sites/default/files/imagecache/400xY/silivani.jpg)
Silav li te bin çiyayê rû spî Arjeno
Evîndar û şêrgeleyo
Îro jî: Jiyan çiyaye, hêvî çiyaye
Hoo hevalo, helbestvano
Eve peyên te ne dibiriqin mîna bişkurîna te
Ya çi caran ji ser û çavên te bar ne kirin:
Gelek caran min xwast ez herim çiyê!! Min dixwest ez herim, raste rast jiyana wan mirovan bi çavê serê xwe bibînim, bi wan re bijîm, nebû qismet.
Silav li te bin Arjeno,,
Silav li te bin xwedanê peyvên viyan û berxwedanê
Silav li te bin xwediyê sunda xwe:
Sundek min hebû, min gotibû, ezê ji vî welatî neçim
U tu neçûyî û te sunda xwe parast hevalo.. Arjeno
Û pora te ya qijavijî û simbêlên te yên boq, bi azadî axa Amedê maçîkirin
Ew Ameda tu bûyî yek ji sîmayên wê
Mîna şurihê, mîna deriyên wê.
Û heval û hogirên te
Zerî û evîndarên te
Li te xwedî deriketin hevalo.
Hevalo Arjeno
Were da careka dî van çar malikên te, liber bayê azadiyê û tembûra Îzedîn Temoyî, li baxçê nivîseran, bo stêrên sema xweş kirin, dîsan bibêjin:
Ezê li çiyayekî bikim navê yekê
Tu navê qîzekê bigihure bike beybûn
Pel pel hebûn, sor sor serxwebûn
Kulîlkan çil kezî biser kê de birîn??
Erê hevalo, serxwebûn, serxwebûn, serxwebûn
û çi dî ne ji bilî serxwebûn!!
Çi neqişê li beraya ev gotina te Arjeno:
Jiyan kêlîkeke, tiştê ku îro bê kirin, min nexwesitî ye ez îro bikim, ji bo min sibe tune!!!!
Erê keku, heke me îro serxwebûn nexwest, pa kenikî emê bixwazîn?? Heta kengî em bi şerm li ber destê xanî rawesitîn?? Kengî dê mizgîniya wî viyay, gehînin destî???
Serxwebûn, serxwebûn!! û çi dî ne ji bilî serxwebûn!!
Arjeno, rûgeşoo, xwîn şirîno, ka ew ramûsan? Te li kîjan gelî veşartin??? Çima te veşartin??
Çi nemaye ev bihar dê bi xemil û gulên xwe ve were, û qîzên Umeriyan dê ramûsanên te aşikira kin û ji nû li dol, newal, deşt û çiyan çînin ve!!! û bi runidikên evînê avdin ve.
Arjeno çav bi keniyo, çend bi ruh sivkî te digote hevalên xwe:
Bi xwedê kêfa min ji mezinatyê ra nayê, gurî min mezinatî ne ewe ku tu li ser kursiyekê li jor bî, li gurî min, mezinahî ewe ku tu di dilê xwe de nefs biçûk bî, û kirinên te mezin bin. Kurd sibe tiştekî mezin bidin min jî ezê bêjim: Heyran li min bibûrin, bi kêrî min nayê.
Heyran, ka were careka dî bi peyva ez heyran, civata me geşke.
Bejin delalo Arjeno
Evîndarê deşt, mêrg û çiyanoo.. Arjeno
Hey dînukeyê cîhana helbestê Arjeno
Te bi hemî bawerî digot:
Nivîskarî dana xwedê ye
Û te Bavê Nazê jî dikir şahidê gotina xwe Arjeno
Were Arjeno da bi deh malikên helbesta te ya wek te bi hêvî, xatirê ji civata ji bo rêzigirtin û mezinahiya qelemê te amadebûn, xatirî bixwazin:
Hêleke min diqutufe ji sermê
Çiya keleheke asê. Dem asê
Hêviya min kulîlka binê berfê
Ha pel bû, ha pel dibê
û berî tê
tê
tê..
Bibare berfê
Li ber xwe bide kulîlkê
Tu ji vê axê yî, ez ji vê axê!!
Silav li te bin şêrgeleyo, Arjeno, neviyê şêrikelayo!!
12 -12 -2012 -Duhok